KON makalingkod sa senado, buot ni kanhi Philippine National Police Director Ronald “Bato” Dela Rosa nga ibalik ang death penalty sa nasod alang sa mga makombikto nga drug trafficker.
Si Dela Rosa kinsa nibisita sa Sugbo kagahapon, Disyembre 1, nibutyag nga dihang siya pa ang Director General sa Bureau of Corrections iyahang nahinabi ang mga insik nga drug trafficker ug didto niya napamatud-an kon unsa kahuyang ang balaod sa nasod.
Matod niini nga priority agenda niya ang pagbalik sa death penalty diin angay kini nga ipatuman sa mga drug lord nga mopalusot og drugas sa nasod.
Dugang ni Dela Rosa nga daw dali mapalusot ang shabu sa nasod base na usab sa mga insik nga mga drug lord nga gikan sa Singapore, Hongkong, ug mainland China, tungod kay huyang ang balaod sa Pilipinas ingon man wala’y death penalty nga silot.
Si Dela Rosa kinsa magpapili isip senador sa umaabot nga piniliay sa Mayo 2019, nibisita sa Sugbo kagahapon ug nitambong sa Anti Drug and Peace & Order Summit 2018 sa lungsod sa Tuburan.
Usa si Dela Rosa sa mga nahimong PNP Chief sa administrasyon ni Presidente Rodrigo Duterte kinsa nipatuman og “Oplan Tokhang” ug “Oplan Double Barrel” isip kampanya batok drugas.
Nakita usab ni Dela Rosa nga sa dakbayan sa Sugbo wala pa mawagtang ang problema sa drugas apan naminusan kini, “naa pa gihapon apan dako na ang kausaban.”
Dugang niini nga makita nga daghan pa kini tungod kay daghan pa ang patay nga nahitabo diin nisukol ang durugista ngadto sa pulis hinungdan nga napatay kini.
Namahayag usab kini nga daghang pulis ug kaniadto narcopoliticians ang nagbag-o na tungod kay nahadlok kini nga patyon.
Dugang niini nga kon illegal ang pagpatay sa usa ka tawo, kinahanglan nga aduna’y manubag niini bisan paman ang mga pulis.
“Kana nagpamatuod nga ang inyong pulis, and inyong gobyerno, wala gina-tolerate, wala gina-condone ang binoang nga binuhatan sa atong kapulisan,” si Dela Rosa kabahin sa pagkakombikto sa tulo ka pulis nga mipatay sa 17-anyos nga si Kian delos Santos.
“So buot pasabot nga the criminal justice system is running well and soundly sa atong nasod. Wala ta’y gitago nga kamatuoran.” HBL