GAWAS sa ginagmay nga mga tulis nga halos mahitabo matag-adlaw nia usab kining dagkong tulis nga halos maka-usa sa usa ka semana mahitabo.

Niadtong Domingo sa gabii duha ka mga chinese national ang gitulis ug gipamusil, nikalas pa og usa ka kinabuhi.

Mga alas 7:30 sa gabii saJusto Ramonal, Brgy 32., ning siyudad pagkanaog sa sakyanan nila Shu Ziang ug Ann Young diha sa ilang balay gisunod kini sa lima ka mga lalaki ug nideklarar og tulis.

Dihang nidumili si Young paghatag sa iyang bag gipusil kini sa bukton ug dihang nisuway pagsukol si Ziang nga gituohang drayber ni Young gipusil usab kini ug nakabsan sa kinabuhi. Si Young usa ka negusyanti og RTW sa Cogon.

Dili pa matino ang kantidad nga nadala sa mga tulisan apan nitumaw ang taho nga moabot ngadto sa P200 mil.

Naunsa na intawon kining atong siyudad karon? Hangtud asa taman kining mga pagpanulis ug pagkalas og kinabuhi?

Bag-o pa lang gani gitukod ang City Intelligence and Detective Unit (CIDU) ingon man nia kining 100 ka mga bag-ong polis nga gigamit alang sa police visibility apan daw wala may pulos.

Ning pagsugod sa 2010, ang nabiktima sa dako-dako nga tulis mao ang Honda Motorworld, gisunod ang LBC ug kadtong payrol sa PICMAW nga gikan gi-withdraw sa bangko.

Kinsa kaha ang sunod nga mabiktima sa mga tulisan nga nia ning dakbayan sa Cagayan de Oro? Makalilisang... kong akoy taga laing dapit mahadlok na siguro ko nga mosuroy ning dakbayan tungod niining mga pagpanulis. Makaluya kaayo hunahunaon nga daghan na kaayong mga pagpanulis ang nahitabo apan walay tulisan nga nangasikop. Pagka nalang!

Mangutana kita sa atong mga lokal nga opisyal kong luwas pa ba kita ug ang atong mga bisita sa atong pagsuroy-suroy ning siyudad sa Cagayan de Oro? Ang siyudad nga naila kunong 'The City of Golden Frienship'.