ANDAM modawat ang buhatan sa National Bureau of Investigation (NBI)-Northern Mindanao niadtong mga katawhan nga biktima pa sa laing scam dinhi sa rehiyon.
Kini ang gibutyag ni NBI Regional Director Patricio Bernales Jr. atol sa paghinabi kaniya sa prensa lakip Superbalita Cagayan de Oro.
Gibutyag niini nga kung aduna pay biktima sa laing scam, mahimong karon pa daan moreport na sa ilang buhatan aron kini maaksyunan.
Kini human nadawat ang report nga duna pay laing mga nabiktima sa scam sa rehiyon ug kasikbit nga rehiyon.
Aduna sab kini obserbasyon niadtong mga na scam nga unta dili deretso magbubo sa ilang kwarta sa walay kasiguradohan tungod kay dakong imposible kaayo kon imong kwarta modoble og kapila.
Sa pagkakaron, nakapokos ang NBI sab sa kaso ni Mark Freeman, kinsa utok sa Ploutos Coins investment scheme.
Gisugdan na usab nila ang pagpangita niini labina nga ubay-ubay na nga biktima niini ang nagpasaka og kasong syndicated estafa ug mitaho sa ilang buhatan.