SUPERBALITA CEBU

Usbaw sa plite sa bus isibog na

TUNGOD sa sunodsunod nga rollback sa presyo sa krudo sa nakalabayng mga semana, dili na ipadayon sa pundok sa mga bus ug mini bus operators sa lalawigan sa Sugbo ang pagpangayo og umento sa pletihan sa Land Transportation Franchising and Regulatory Board.

Apan alang sa usa ka opisyal sa Basak Lapu-Lapu City Jeepney Operators and Drivers Association (Balacjoda), angay gihapon sila mangayo og umento kay wa mokunhod og apil ang mga presyo sa bugas ug nag-unang palaliton ingon man ang mga ligid, battery ug pisa sa mga sakyanan.

Si Julito Flores, presidente sa Cebu Provincial Bus and Mini Bus Operators Transport Cooperative, namahayag nga makiangayon alang sa mga sumasakay nga dili na sila mangayo og usbaw sa pletihan kay nagkakunhod ang presyo sa mga produkto sa petrulyo.

“Unsa pa man ang angay pangayuon nga barato naman ang presyo sa krudo. Ang atong gipangayo nga umento tungod sa padayon nga pagsaka sa presyo sa krudo unya karon niuna man og abot ang gipangayo sa katawhan, niubos naman ang presyo. Ako na ang mopasabot sa akong mga kauban,” padayag ni Flores, konsehal sa lungsod sa Barili, dihang nahinabi sa Superbalita Cebu kagahapon, Disyembre 2.

Ang CPBMTC adunay 40 ka mga miyembro nga naglakip sa Librando Lines, Cebu Auto Bus, Sunrays Bus Lines, JRK South Transport, JBH Trans, Calvo Lines, Pioneer Transport, Alowie Trans, mini bus operators sa amihanang Sugbo ug uban pa.

Ang Cebu Provincial Bus Operators Association (CPBOA) ug Cebu South Mini Bus Operators Association (CSMBOA) nihangyo sa LTFRB nga himuong P10 ang unang lima ka kilometro ug P1.50 ang mosunod nga kilometro human sa sunodsunod nga pagsaka sa presyo sa mga petroleum product sa nangaging buwan.

Sa kasamtangan, P6 ang minimum nga pletihan sa bus sa unang lima ka kilometro ug dugang P1.20 sa mosunod nga kilometro.

Si Flores, presidente usab sa CSMBOA ug tigpamaba sa CPBOA, namahayag nga dili na nila iduso ang gikinahanglang mga dokumento nga mo-justify sa ilang gipangayo nga usbaw sa pletihan diin nangayo sila og 15 ka adlaw nga lugway sa pagsumitir niini human mahitabo ang public hearing niadtong Nobiyembre 9.

Matod ni Eduardo Montealto Jr., regional director sa LTFRB 7, maayo ang himuon sa CPBOA kon dili na mangayo og usbaw sa pletihan gumikan sa rollback, apan kinahanglan moduso ang grupo og petition for withdrawal kay nasang-at na niya ang pasiunang kopya sa petition niini.

Gidugang ni Flores, sa kasamtangan naa na sa P38 hangtod sa P42 ang presyo sa matag litro sa diesel.

Sa habig ni Romeo Armamento, auditor sa Balacjoda ug national vice president sa National Confederation of Transportworkers Unity (NCTU), siya niingon way kaseguroan ang rollback sa presyo sa krudo kay kon mobalik og saka, kapila usab pil-on ang pag-usbaw sa presyo.

“Ang kana bayang pagsaka sa presyo sa palaliton resulta baya na sa pagsaka sa presyo sa fuel niadtong nangaging buwan. Gi-capitalize man gud sa mga negosyante ultimo gani kamunggay pwerte nang mahala,” dugang niya.

Siya nisugyot nga maghimo og automatic fare fixing ang LTFRB nga ibase og formula kon dunay paglihok sa presyo sa mga produkto sa petrulyo.

Karong adlawa, Disyembre 3, magtagbo sa unang higayon ang mga sakop sa technical working group sa LTFRB uban sa ubang ahensiya sa kagamhanan aron paghimo og formula sa predetermined nga pletihan kon moirog ang presyo sa krudo. (B)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph