GIKLARO sa kapolisan sa Cagayan de Oro Police Office (Cocpo) nga napasaka na ang kaso batok sa suspetsadong mga gunman sa presidente sa University of Science and Technology of Southern Philippines (USTP) niadtong 2017.
Takdo usa ka tuig niadtong Disyembre 2 human gipatay si Dr. Ricardo Rotoras.
Gibutyag ni Police Superintendent Mardy Hortillosa, tigpamaba sa Cocpo nga napasaka na ang kaso batok sa suspek nga maoy gitudlo nga gunman kinsa nailang si Johnreal Gamanay y Abel alyaw “Junrel Gamanay, alyas “Alejandro Ceniza” ug alyas “Jun Putot” nga dunay criminal case no. nga CR- ORD 20182717 ug wala kini girekomendang piyansa.
Nasabtan usab niini nga buot sa pamilya nga mismong ang mastermind gyud ang manubag.
Nasayran nga dismayado ang pamilya ilabi na ang igsoon sa biktima nga si Eldie gumikan alang niini walay kalamboan ang maong kaso ug padayon nga naghangyo sa mga otoridad nga mapaspasan ang kaso ug matumbok kung kinsa ang mastermind.