TAKDO usa na ka tuig gikan gipatay si Dr. Ricardo Rotoras, ang presidente sa University of Science and Technology of the Philippines, apan ang pamilya niini dili kumbinsido ug dismayado sa dagan sa kaso karong panahona.
Kini ang gibutyag sa igsuon sa namatay nga mao si Eldie Rotoras.
Pabilin nga dili kumbinsido si Eldie sa nadakpan nga suspetsadong mga gunman nga mao si John Real Gamanay kinsa nadakpan sa Luzon area.
Taliwala nga napasakaan na kini og kaso apan daw dili siya kumbinsido gumikan kay una na nga namahayag ang kapolisan nga walay igong ebidensya niini ug daw basin mabasura lamang kini ug ma walay bili ang maong kaso.
Dako ang pagduda ni Eldie nga adunay mi cover-up niini nga kaso gumikan kay pila na ka polis o director ang gipang re-assign wala gihapon kasulbaran niini.
Samtang si Police Superintendent Surki Sereñas kinsa tigpamaba sa Police Regional Office (PRO)-Northern Mindanao mapasaligon nga palig-unon ang kasong napasaka batok sa gitumbok nga mga gunman ni Rotoras aron walay kaso nga mabasura.
Kahinumduman Disyembre 2 tuig 2017 gipusil patay si Dr. Rotoras gawas sa ilang puloy-anan sa Upper Carmen ning siyudad sa Cagayan de Oro dihang pagawas na kini sa iyang sakyanan.