MGA kasong attempted homicide, reckless imprudence resulting in damage to property ug reckless imprudence resulting in physical injuries ang gipasakang kaso sa kapulisan batok ni Joavan Fernandez.
Kini resulta human misuol na sab ang utok sa anak ni Talisay City Mayor Soc Fernandez, dihang nigukod ug nanion og armas sa magtiayong Jonathan ug Irene Ignacio.
Sama sa naandan nidupa na sab ug nagpakiluoy si Soc sa mga reklamante a-ron maareglo ang kaso. Kadaghan naman gud ni mahitabo kay di man lang usa o duha kon di daghan na ang mga kasong giatubang aning bataa. Ug di sab unta ngil-ad ang makanunayong pagka konsetidor sa mayor kun di pa unta siya pulitiko.
Di malalis, si Soc pinangga sa katawhan sa Talisay tungod sa kabuotan, katarong ug di kurakot. Apan ang iyang paglaban batok sa mga tinunto ni Joavan gikasuko sa mga tawong nagtahud kaniya.
Panghinuktok kuno mayor kon maayo ba ang imong gihimo? Tan-awa ang nahitabong bangis nga krimen nga nahimo sa parehog utok sa imong anak. Mosugot ka nga kini iyang mahimo sa umaabot nga mga adlaw?
Posible sab ganing talikdan ka sa katawhan niining sobli nimong pagpapili sa pagkamayor. Tan-aw ang imong kaugmaon ug ang kaugmaon ni Joavan. Ipasud nana sa drug rehabilitation center Sir!
KALUOY SA MGA PINIRISO
Daghan ang nasubo sa kalit nga desisyon ni Gobernador Gwen Garcia sa pagpahunong og sayaw sa mga piniriso sa Cebu Provincial Detention and Rehabilitation Center
(CPDRC ). Sa akong nahibaw-an, ang sayaw usa ka ehersisyo ug pamaagi sa usa ka rehabilitasyon.
Sa ato pa, angayan kining ipadayon ug di wad-on. Sa ilang kasubo tungod sa ilang pagkapiniriso, ang pag-sayaw dakong tabang sa pagpapas sa ilang kaguol ug kamingaw sa ilang pamilya
Kon kini hingpit nga mawagtang ang gikalingawan sa mga piniriso pinaagi sa maayong konsepto ni consultant Byron Garcia, makapabalaka sa pagbalik unya sa problema sud sa bilanggoan.
Kaniadto dunay mga kaso sa jail break, drugas ug sugal. Gani giila ang CPDRC sa Department of Interior and Local Government ( DILG ) nga modelong bilanggoang ug angayang sundon sa ubang local government units ug aron ipatuman sa mga bilanggoan sa kalungsoran.
Sayon naman lang ang pagsunod kun lain nang tawo ang moda sa mga piniriso kay disiplinado naman ang mga binilanggo. Mao nga atong ipadayon ang ilang kalipay taliwa sa ilang kaguol.
(efren_lonzon@yahoo.com o text sa 09084171222)