KON ganahan ka og kape ug mahiligon sa ukulele, ug artsy usab ka, mao na kini ang imong gipangita.
Aduna na kay maadtuan nga ukulele-themed cafe.
Ang Uke Hub Kafe nahimutang sa Mactan Arcade Building, Airport Road, Barangay Ibo.
Ang Uke Hub Kafe adunay lain-laing klase sa kape, sandwiches, lasagna ug uban pang snack foods.
Gawas niini, adunay selection of ukelele nga imong mapilian, masuwayan ug mapintalan.
Gikan sa P70 ngadto sa P120 ang presyo sa kape ug frappuccino.
Daghan ra ka og kapilian, pero ang bestsellers sa Uke Hub Kafe mao ang Maia’s Roll-up Lasagna (P140), Cubano Cebuano (P165), Ultimate Tuna Melt (P120) ug Classic Ham & Cheese (P120).
Samtang gakape-kape ka, pwede ra mosuway o magkat-on sa ukelele. Available pud ang Paint & Play Ukelele Craft Kit (P1,999) nga naglangkob og soprano ukulele gikan sa Susing’s Guitar, soft case, acrylic paint set of 6, artist paint brush set, palette ug guide booklet.
Matod sa tag-iya sa Uke Hub Kafe nga si Henry Bunagan III, tungod kay naa man ang iyang pamilya sa guitar business ug siya ug ang iyang asawa nga si Creselda ganahan og kape, nakadesidir sila nga mag-abli og ukelele-themed coffee shop.
Aduna usab sila’y “Paint & Play Your Own Ukulele” workshop. I-check ang Facebook page sa “Uke Hub Kafe” alang sa schedule.
Abli ang Uke Hub Kafe kada adlaw, 6 a.m.-10 p.m.
Matag Sabado, mo-extend sila sa ilahang business hours ngadto sa alas dos sa kaadlawon tungod sa ilahang acoustic ug open mic nights.
So kung aduna ka’y flight unya taas pa ang imong oras before sa boarding, hapit sa Uke Hub Kafe.
Singko minutos ra paingon sa airport.