KAPIN sa libo ka mga opisyal sa mga barangay ug SK sa lungsod sa Tuburan ang nitambong sa miaging Dominggo sa usa ka unang Anti-Drugs and Peace Summit nga gitambongan ni kanhi PNP chief Ronald “Bato” dela Rosa.
Nagkanayon si Mayor-on-leave Aljun Diamante nga kining kampanya batok sa gidiling drugas ug ang kalinaw ug kahapsay maoy mga yawe alang sa kalambuan. Alang kang Mayor Diamante, ang mga elected officials nga wala manambong sa maong summit, maiisip nato nga protector sa mga druglord.
Namulong sab sa maong kalihokan si Bise Gob. Agnes Magpale nga nidagan karon alang sa pagka gobernador sa lalawigan sa Sugbo uban nilang Asec Jonji Gonzales sa Office of Presidential Assistant for Visayas (Opav).
Laing mamumulong sa summit ug nakig-miting sa mga SK officials sa lungsod mao si Julius Gutierrez, ang chief operating officer (COO) sa National Youth Commission. Si Gutierrez usab ang representante ni kanhi SAP Bong Go sa maong summit.
Giduso sab ni Bato ang iyang adbokasiya batok sa gidiling drugas sa usa ka rally didto sa Tuburan nga gitambongan sa kaatbang nga kampo sa politika nga gipangulohan ni Kong. Gwen Garcia nga nidagan sa pagkakaron alang sa pagka gobernador ug Pablo John Garcia, nga nidagan sa pagka kongresista.
Cebu City
Padayon ang mga kalamposan sa Cebu City Police Office (CCPO) batok sa gidiling drugas ug kini klarong nakita sa mga kadagkuan sa Cebu City Hall diha sa mga proposed resolution ni Konsehal Dave Tumulak.
Atong malantaw ang maayong relasyon tali sa LGU ug sa kapulisan.
Alang kanako, mahinungdanon kini labi na nga nagsingabot ang Pasko ug ang Sinulog. Gikinahanglan ang maayong relasyon ug koordinasyon sa Syudad sa Sugbo ug kapulisan.
Bohol
Nahimuot ko sa mga pagsaway nga gilabay sa pipila nga way nahibaw-an sa tinuod kabahin sa National Food Authority (NFA) ug si kanhi Cabsec Leoncio Evasco.
Subo nga tungod kay nidesisyon kini si Evasco nga modagan alang sa pagka gobernador sa Bohol, daghan dayon ang mga isyu nga giimbento batok kaniya. Usa niini mao ang krisis sa bugas nga gimugna ni kanhi NFA chairman Jason Aquino.
Kahinumduman, samtang si Aquino mao ang chairman sa NFA, si Evasco mao ang chairman usab sa NFA Council. Ang council mao ang policy-making body nga mogiya sa NFA. Ang nakaapan kay si Aquino nisupak sa mga lagda sa NFA Council kay ang nauna kumplot man sa sindikato sa bugas. NIresulta kini sa grabing krisis.
Wa dayon nasakpan ni Presidente Duterte ang kalaki ni Aquino. Apan sa ngadto-ngadto, napugos ra kini sa pagluwat sa katungdadan sa NFA.
Apan ang mga maayong laki gituis ang kamatuoran ug si Evasco na hinuon ang gihimong sad-an. Hahay gyud ning politika. (@anol_cebu sa Twitter)