Cebuana ultra marathoner nakakulit og national record

NAKAPOSTE og bag-ong national record ang Cebuana ultramarathoner nga si Rhoda Caballero-Oporto sa iyang pagsalmot sa 2018 Soochow International Ultramarathon IAU 24 hours Asia & Oceania Championships sa Taiwan niadtong Dominggo.

Sulod sa 24 ka mga oras nga pagdagan, si Oporto nakaabot og 160.9 ka mga kilometro nga maoy labing taas nga naabot sa usa ka babayeng ultra marathoner sa Pilipinas.

Si Oporto, kinsa nagrepresentar sa Philippine Association of UltraRunners (PAU) Team, nahiluna sa ika-18 nga dapit sa lumba nga gisalmutan sa dekalidad nga ultramarathoners sa tibuok Asya.

Ang midaog sa women’s division mao si Yuri Matsumoto sa Japan, kinsa nakaabot og 219.2K, ikaduha si Tia Jones sa Australia (218.7K) samtang ikatulo ang laing Japanese nga si Aiko Kaematsu (212.7K).

Wala man tuod siya nasulod bisan sa Top 10 apan ang paninguha ni Oporto igo na aron buakon ang rekord sa Pilipinas nga kanhi gihuptan ni Mylene Ugali Elliot, kinsa nakaabot og 134K sa iyang pagsalmot sa IAU World Championship 24-hour Endurance Run sa Ireland.

“It’s a different experience for me,” matod ni Oporto sa interbyu sa Sun.Star Cebu. RSC, ESL