NASIGNIT na sa mga otoridad ang supek nga mi-ambush patay kang Joseph Datuwata Kuan, usa ka Muslim-Chinese businessman ug kandidato pagka-konsehal sa siyudad sa Cotabato.

Giila ni Cotabato City Police Director Senior Superintendent Willie Dangane ang suspek nga si Tony Bacar, minyo, mag-uuma, ug nagpuyo sa Sitio Sartur, barangay Dalican, Datu Odin Sinsuat Maguindanao Province.

Padung sa paggawas ang biktima sa iyang bay sakay sa iyang Isuzu Frontier aron ihatud ang iyang mga anak sa tulunghaan dihang giharang siya sa mga suspek ug gipusil.

Apan nakahimo pa sa pagsukol si Kuan ug nakailog og armas sa mga suspek.

Sa gilusad nga operasyon sa Task Group Tugis ug kapulisan, nadakpan si Bacar kinsa dunay samad sa iyang dughan.

Atol sa interogasyon, ginganlan sa suspek ang iyang mga kauban nga sila Sacaria Ando alyas Mader Abdullah ug Madia Anki alyas Dado Angkay.

Gidugang ni Bacar nga sila gisugo sa usa ka Manzor Kanapia alyas Manzor Abunawas nga dagiton ang negusiyante, human niini ipalukat og P10 milyunes, dayon patyon.

Matud ni Dangane nga kidnapping ang motibo sa mga suspek apan wala nagmalampuson human misukol si Kuan ug napatay.

Gitahasan sab ni Cotabato City Mayor Muslimin Sema ang kapulisan ug militar nga labaw nga pahugtan ang seguridad sa siyudad gumikan sa hulgang pagpangdagit sa Pentagon kidnap gang. (Edgardo Fuerzas)