ANG tinguha pag-ikyas sa usa ka binilanggo nga miresulta sa iyang kamatayon maoy hinungdan nga gidoble sa mga guardiya ang ilang pagbantay sulod sa Davao City Jail didto sa Maa, siyudad sa Davao.

Napusilan patay si Rey Aragon Angeles, 26, nabilanggo sa Maximum Cell number 3 ug nagpuyo sa Puting Bato, Barangay Riverside, distrito sa Calinan, human niya giatake ang mga guardiya sa alas 3:55 sa hapon niadtong Dominggo.

Si Angeles dunay kasong murder nga nakadoket sa criminal case number 65, 564-09 sa Regional Trial Court (RTC), Ecoland.

Si Davao City Jail officer-in-charge Senior Inspector Ian Glenn Ocmen nagbutyag nga doblehon nila ang kaigmat sa pagbantay sa mga piniriso aron dili na mahitabo ang gihimo ni Angeles.

Giingon nga mikuyog si Angeles sa panon sa mga bisita nga miguwa sa bilanggoan ug mikatkat sa ikaduhang andana dayon giatake si Jail Officer 1 Rogelio Go nga didto nagbantay sa Post number 2.

Si Go nakahimo sa pagpalayo niadtong higayona apan giatake hinuon si Senior Jail Officer 3 Arnold Sierra kinsa nakahimo pagsipa kang Angeles, apan mibangon kini ug giatake na sab si Go gamit ang usa ka improvised nga icepick.

Si Jail Officer 1 Paquito Eyao kinsa nakakita sa panghitabo nakahukom nga pasalbahan si Angeles apan misamot ang tensyon mao nga napusilan si Angeles.

Mga kabanay ni Angeles nahinaway sa tagdumala sa City Jail gumikan kay wala kini nakahimo sa pagpakalma sa namatay nga dili gamiton ang armas.

Si Ocmen nangatarungan nga gihimo lang ni Eyao ang iyang trabaho isip gwardiya niadtong higayona ug andam silang motabang sa kabanay sa tanang galastohan sa pagpalubong sa namatay.

"Nagkasabot mi nga mag-amot ang tanang personahe aron makahatag mi og financial assistance sa iyang pamilya," suma ni Ocmen.(AD)