SIKAT kaniadto ang kanta nga gi-compose ni Freddie Aguilar nga “Bulag, Pepe at Bingi.” Kadtong sama kanako nga nakadungog niini maka-relate sa maong kanta puwera sa mga milenyals nga lahi na ang gipaminaw nga kanta karon.
Sumala sa maong kanta nga maayo pa ang mga buta kay dili makasala sa dautang makita sa kalibutan. Maayo sab daw ang mga amang kay dili sila makasulti og dautan ug makapasakit pinaagi sa pulong ngadto sa isigkatawo.
Mipadayon pa ang kanta nga suwerte daw ang mga bungol kay mingaw ang iyang palibot dili pareha karon nga makabungog ang kasaba. Kung wa ko masayop nakadaug sa unang premyo ang maong kanta sa usa ka nasudnong Song Festival nga gisuportahan ni kanhi unang ginang Imelda Marcos.
Sukad niini, nisikat si Ka Freddie ilabi na nga sa sunod nga tuig, iyang gi-compose ang hit song nga “Anak” nga gihubad pa sa ubang pinulongan sa kalibutan.
Nidayeg ako sa maong kanta kay gihimong positibo ang kabilinggan sa tawo ug gihatagan niya kini ug importansiya. Mao nga inay nga tawagon nato ang tawo nga may kabilinggan ug “Disabled Persons,” giusab na kini ngadto sa “Persons with Disability” (PWD) ug “Differently-abled Persons.”
Sa pagkatinuod, daghang mga balaod sa Pilipinas nga pabor sa PWD apan sa gihapon ang problema mao ang tukmang implementasyon niini. Dunay Magna Carta for PWD nga nagaingon nga at least 5% sa mga trabahante sa buhatan sa gobyerno mga sakop sa PWD. Ambot lang kaha kung gisunod ba kini sa gobyerno?
Dinhi sa Davao gipangbutang ang mga PWD sa sinehan. Duna pay nasudnong balaod nga gitawag og “Accessibility Law” nga nagmando sa mga gambalay o building nga butangan og ramp o agianan nga sayon agian sa mga PWD apil niini ang tukmang kasilyas ug parking area alang kanila. Naa poy mga bunguton nga drayber nga didto moparada sa ilang sakyanan sa parking space nga alang unta sa PWD. Apan gawas niini, adunay nabantayan nako sa atong mga bag-ong tubo karon nga gitawag og “millennials” nga nitakdo sa kanta ni Ka Freddie apan sa baliktad nga kahimtang. Tungod tingali sa daghang gadget karon, nahimo nang buta, amang ug bungol ang mga batan-on karon.
Naghinobra ang pagpunay nila'g duko sa ilang gadget nga dili na nila makita ang panghitabo sa palibot. Anaa na gani nabanggaan og sakyanan ug nahulog sa bangag sa pagsige'g tan-aw sa gadget.
Sa laing bahin, mora na sab og amang ang mga bata kay ipaagi na man sa teks ang komunikasyon. Mogamit pag-jejemon nga sila ray makasabot.
Usahay moabot ako sa among balay nga hastang mingawa ug ngitngit bisan anaa sa sulod ang akong mga anak. Wala na pod mi mag-istorya inig kaon kay gasige'g paminaw sa ilang sounds nga sila ray makadungog.
Matingala sab ta karon sa mga batan-on nga anaay nagbitay nga kuryente sa ilang dunggan. Ang akong silingan nagsige'g singgit kung mosugo sa ilang mga anak kay di makadungog kay naay earphone kanunay. Haay ambot, maka-relate ba mo ani?