Fredrick F. Gelbolingo
121 Prenza, Argao, Cebu
TUNGOD sa kasuko ni Noy Iyong nga sa matag buntag manimahong angso ang kilid sa iyang balay, iya kining gibutangag paskin nga nag-ingon, “Ang Mangihi Dinhi, Satanas!” Usa kini ka dakong karton sa sigarilyo ug uling ang iyang gigamit sa pagsulat.
Gisad-ong kini niya sa lansang nga gitarok sa bungbong nga sin sa kilid nga bahin sa iyang barungbarong, nga mao gyuy kanunay ihian. Makabasa dayon niini si kinsa man kadtong way batasan nga kusog mangihi ug mao nga dili na modayon. Tiaw moy tawgog Satanas ang mangihi! Ganahan ka ana?
Gikan sa layong bukid si Noy Iyong. Napadpad siya dinhi sa siyudad aron pagpangitag maayong kapalaran, apan kaalaot ang iyang nahiaguman. Nahimo siyang basurero, mamunitayg lata, puthaw, aluminyom, plastik, bronse, newspaper ug mga karton.
Nakatarok siyag pinuy-anan sa kilid sa hilit nga dalan sa Sanciangko mga pipila lang ka lakang gikan sa mga bar nga imnanan. Ang iyang barungbarong ginama lang sa mga kinit-an ug pinunitang mga linabay nga mga kahoy, sin, karton ug mga ‘streamer.’
Tuod man milabay ang pipila ka mga gabii nga wala nay nangihi sa kilid sa iyang balay. Nagkawala na ang angso nga iyang masimhot panahon sa kabuntagon inigpadung niyag lakaw para mamasura. Iya kining gikahimuot kay milampos diay ang iyang hinimong paskin.
Apan usa ka tungang gabii niana sa wa pa siya makatug kay nag-inom siyag usa ka lapad sa bino agig pahilis sa iyang gikaon nga fried chicken nga nakuykoyan niya sa trash bag sa Bamboolbee, kalit may nadunggan siya nga hinaguros sa tubig nga mibanda sa bungbong nga sin sa iyang barungbarong.
“Animal! May nangihi na pod sa bungbong sa akong balay! Giatay baya…!” namalikas si Noy Iyong nga daling migawas sa balay nga nagsusapinday. Naabtan gyud niya ang tawong nangihi.
“Hoy, animal! Wa ka ba kabasa nianang paskin nga imong giatubang? Gibutangan ko gani kanag suga!” gisinggitan ni Noy Iyong ang nangihi uban ang pagtudlo sa paskin. Nagmaoy na siya. Naglabyog-labyog ang iyang ulo tungod sa kahubog.
“Nakabasa man,” tubag sa nangihi.
“Basaha kunog usab!” nangusmo si Noy Iyong sa kasuko.
“Ang mangihi diri, Satanas!” basa sa nangihi.
“Unya malipay kag tawgon niana?!” singhag ni Noy Iyong nga daw kapaakon.
“Nganong di man ko malipay…?” tubag sa nangihi nga miyugyog sa iyang buhi ug miatubang kang Noy Iyong. “…Nga si SATANAS man gyud ko! Bwa-ha-ha-ha! Bwa-ha-ha-ha!”
“S-Si S-Satanas gyud tuod!” Nahuwasan og kalit si Noy Iyong sa iyang kahubog. “W-Wa lang tay hilabtanay, ha…!”
“Unsay wa? Ngari bi. Kini imo, ay. Isog ka? Umph!” ug gibunalan si Noy Iyong sa ikog ni Satanas.
“Agay! Husto na! Di ko mosukol!” tiyabaw ni Noy Iyong nga nagkapulikig panagang sa ikog ni Satanas. (KATAPUSAN)