HAPIT maputol ang liog sa barangay tanod sa lungsod sa Pinamungajan, Sugbo human giabis sa iyang gikaaway ginamit ang sanggot.
Ang krimen kagahapon sa mga alas 10 sa buntag nagagumikan lang sa away panagat.
Ang tanod nga si Hermijildo Laolaog, 29, taga brgy. Manguto, nakadagan pa apan natumba ug gitiwasan sa paglulog sa gikatahapan nga si Ricardo Canales, 60, mananagat.
Ang duha mga managsilingan.
Sa imbestigasyon sa kapulisan, nasayran nga ang biktima nagkaon duol sa baybayon sa dihang kalit nga niabot ang gikatahapan nga nagdalag sanggot.
Wa makabantay si Laoglaog sa pag-abot ni Canales.
Ang gikatahapan samtang diha sa likod sa biktima nikupot sa buhok niini dayog abis sa liog.
Bisan kon samdan na, nakadagan pa unta si Laoglaog apan mga says metros pa ang gilay-on, nalamba ang biktima ug gitisawan sa paggulgol ang liog nga maoy nakaingon sa iyang hinanaling kamatayon.
Base sa imbestigasyon, nasuko ang gikatahapan sa biktima tungod kay mao kini ang iyang kompetinsya sa panagat.
Gani nasayran nga daghan nag reklamo sa barangay ang gikatahapan tungod gihapon sa away sa pagpanagat sa ilang lugar.
Hinuon si Canales bulontaryong nitahan sa kapulisan sa Pinamungajan.
Ang gigamit nga sanggot gi-turnover ra usab sa mga tanod kinsa nakakita human gilabay sa gikatahapan.