DUHA ka mga tawo ang giluba patay sa duha ka managlahi nga insidente dinhi sa siyudad sa Davao. Ang usa gipatay tungod sa selos samtang ang usa gipatay tungod sa daghang sala nga iyang nahimo sa ilang lugar.
Gipatay tungod sa selos mao si Lani Banglus, hamtong ang pangidaron, minyo, public utility jeepney driver, nagpuyo sa Bagumbayan, Sta. Cruz, Davao del Sur.
Si Banglus giluba sa ala 1:55 sa kaadlawon kagahapon ni Henry Canoy, 38, minyo, nagpuyo sa Madapo Hills, Barangay 5-A Bankerohan, ning siyudad.
Si Senior Police Officer 2 Kelvin Joy Magno, investigator sa San Pedro Police Station, nagbutyag sa iyang spot report nga giluba sa suspetsado ang biktima tungod sa selos, sigun sa pahayag sa mga nakaila kang Canoy.
Mga nakasaksi nagbutyag nga gisaka sa suspetsado ang biktima samtang nagdiskarga sila og saging gikan sa gimaneho nga jeep nga dunay plate number MJV-554.
Usa sa mga nakasaksi nagsulti nga nakadagan pa ang biktima apan gigukod kini sa suspetsado ug gidunggab sa makadaghan nga higayon hangtud nga natumba didto karaan nga detachment sa Bankerohan.
Si Banglus daling gidala sa iyang konduktor nga si alyas Vic-vic didto sa Davao Doctors Hospital apan gideklara sa mga doktor nga patay na ang biktima.
Si Canoy giingon nga nasuko ngadto sa biktima gumikan kay suod kaayo kini ngadto sa iyang asawa nga negosyante og saging.
Samtang gipatay sab tungod sa iyang mga nahimong sala sa ilang lugar mao si Rodelio Villota, alyas Tata, 20, ulitawo, nagpuyo sa Sitio Dominguez, Barangay Manuel Guianga, distrito sa Tugbok.
Si Villota nasiplatan nga dunay samad sa iyang tiyan ug wala nay kinabuhi samtang nagbuy-od sa punoan sa kawayan sa alas 6:00 sa buntag niadtong Lunes.
Si Police Officer 3 Roque Osico sa Tugbok Police Station nagbutyag nga katapusang nakit-an ang biktima sa alas 7:00 sa gabii niadtong Dominggo sulod sa videoke house nga gipanag-iyahan ni Tessie Balobar didto sa maong dapit.
Giingon nga nakig-inom ang biktima sa iyang mga higala apan nianang pagkabuntag nakaplagan nalang siya nga gipatay sa wala mailhing mamumuno.
Ang San Pedro ug Tugbok Police Station nangita na karon sa mga tawo nga mipatay sa mga biktima aron sikopon ug silotan sa korte. (AD)