SUPERBALITA CAGAYAN DE ORO

Todino: Higanting patigayon

Pro Bono

DILI tiaw ning umaabot nga patigayon sa Misamis Oriental nga momugna og 50,000 ka mga trabaho. Grabeh.

Basi sa reports sa Sun.Star Cagayan de Oro, kining $3.5 bilyones nga puhonan ibubo sa usa ka Chinese company diha sa Phividec Industrial Estate sa lungsod sa Tagoloan.

Magtukod ang Panhua Group Company og usa ka integrated steel manufacturing plant sa 305 ka hektaryang luna sud sa special economic zone.

Napirmahan na ang usa ka memorandum of understanding niadtong pagbisita ni Chinese President Xi Jinping sa Pilipinas alang sa maong patigayon nga gipaabot makompleto sud sa unom ngadto sa pito ka tuig.

Dunay bentaha ug duna say dautang resulta sa pagtugot aning steel manufacturing plant o paggama og puthaw.

Ang labing dakong hagit niini mao ang epekto sa palibot diha sa kinaiyahan ug sa mga molupyo. Buot sabton, kinahanglan magmaigmat ang gobiyerno pagpatuman sa balaod aron maprotihian atong kalikupan.

Itugyan nato kana sa Department of Environment and Natural Resources ug uban pang ahensiya sa gobiyerno nga nag-regulate sa tanang kalihukan nga makaapekto sa atong palibot.

Sa kabahin sa local government unit, pangandaman sab nila kining magtakodtakod nga epekto unya sa pagsulbong sa higanting patigayon sa ilang dapit.

Sama pananglit, ang paghuot sa trapiko, paghinit og pinuy-anan, pagsaka sa demanda sa suplay sa tubig ug elekstrisidad, pagdaghan sa basura, kakuwang sa tunghanan, hospital ug uban pang pasilidad.

Mogawas kining problema kon modagsang ang nilibo ka mga tawo sa usa ka dapit nga manarbaho unya. Timan-i dili lang mga trabahador atong gipaabot, lakip na unya ilang pamilya ug gagmayng mga negosyanti nga motubag sa ilang panginahanglan.

Sa laktod, dako kining trabaho sa usa ka lungsod pagdawat og usa ka higanting patigayon nga mopalihok sa lokal ug nasudnong ekonomiya.

Mosugot ta o dili, mas mopasuwabi gyud ang suporta niining umaabot nga patigayon. Ang hangyo lang sa publiko nga unta dunay public hearing o forum aron madungog ang mga concerns nga ipagawas sa yanong mga molupyo.

Kay ang labing batakang hangyo unya sa mga molupyo nga hatagan gyud sila kahigayonan nga makatrabaho. Basin unya mga trabahanti gikan sa China ang pangkuhaon aning Panhua Group. Na ma”Panhu’ay” gyud ta ani.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph