DAGHAN ang natingala og unsa gyod ang rason nga nag-inaugural man sa panglao airport kaniadtong Nobiembre 27 nga mismo si PRRD ang bisita sa pagsubo.
Wala pa mahuman ang airport.
Wala pay canteen, walay bisan usa nga coffee shop, way restaurant o bisan unsa na lang mga kan-anan.
Dunay problema ang salog.
Danglog ang salog.
Hasta ang flooring sa tubes nga gamiton sa mga pasahero pagsulod og gawas sa eroplano, danglog sab.
Bisan gani ang mga kasilyas, maila nga gidali-dali lang pagtrabaho.
Ang pangutana mao kini – nganong gidali dali man pag-inaugural ang maong airport nga daghan pa man og kulang ang maong airport?
• • •
Buyno, nindot ang runway.
Paglupad ug pag-dunggo sa eroplano, hamis ang runway og dili na madungog ang kasikas sa ligid nga molabay sa dili patag nga runway.
Taas ang runway og dili na kinahanglan nga mag-reverse thrust ang makina sa eroplano.
Matod pa ni DOTR Secretary Art Tugade, ang runway dunay gitas-on nga 2.5 kilometers.
Apan mahimo pa kini nga sumpayan aron mahimong 2.8 kilometers ang kataas.
Sa pagka-karon, padayon ang pagtrabaho sa extension sa maong runway aron moabot kini sa 2.8 kilometers.
Midugang si USec Art Evangelista sa Office of Transport Security (OTS) nga maoy gusto sa mga airlines gikan sa US nga makaabot og 2.8 kilometers ang maong airport aron mahimo na sila nga mag-abri sa rota paingon sa Panglao airport.
• • •
Daghan sab ang natingala sa pangalan sa airport.
Gitawag ang airport og “Bohol Panglao International Airport.”
Nganong dili man “Panglao, Bohol International Airport?”
O kaha, “Bohol International Airport?”
O kaha, “Panglao International Airport?”
Nganong lahi man kini sa uban, sama sa Mactan-Cebu International Airport?
Unsay rason nga giuna man ang “Bohol” sa “Panglao” sa paghingalan sa maong airport?
• • •
Daghan ang natingala ngano nga “dry” kaayo ang diskurso ni PRRD panahon sa inaugural program.
Wa gyoy ka life-life, morag way gana si PRRD sa maong higayon.
Dunay “duwende” misulti nga dihay nahibaw-an si PRRD nga balita sa wala pa siya mosulod sa airport terminal nga maoy hinungdan nga namalikas kini og “P____ Ina.”
Matod pa, nahibaw-an kuno ni PRRD nga dunay pipila ka bilyon ka pesos nga insertion nga gihimo sa House alang sa 2019 budget.
Dakong supak si PRRD niini, matod pa sa duwende.
Unsa man kahay buhaton ni PRRD?
• • •
Gahinam-hinam ang mga tawo sa dihang misugod na og sulti si PRRD sanglit nagtuo ang kadaghanan nga basahon ni PRRD ang giingon nga “drug matrix.”
Apan way gibasa ang presidente nga mga lista.
Ngano man kaha?
Dili angay kay inauguration man kadto, matod pa sa usa ka opisyal sa DOTR.
Gani, dihay pipila ka mga “suspetsado” nga mona-mona gyod og paningkamot nga makaduol og makadungog sa isulti ni PRRD ngadto ni Atty. Victor de la Serna.
Apan wa silay nadungog sanglit bugtong si Atty. de la Serna lang ang nakadungog sa gihunghong ni PRRD.
• • •
Makalingaw ang pagarpar ni Kalihim Art Tugade sa DOTR bahin sa maong airport. Gisaysay ni Tugade nga nahuman ang maong proyekto sud lang sa 2 ka tuig, daghang mga kahimanan sa maong airport nga wala pa sa uban, og uban pang mga panghambog.
Apan sa dihang midiskurso na si PRRD, mi-brown out pa bitaw og kalit.
Labing menus, 3 ka minuto ang milabay usa pa mibalik ang koryente.
Wagtang ang tanang gisulti ni Tugade bahin sa maong airport.