ALA Promotions, ONE posible nga mag-partner

ANDAM ang ALA Promotions nga makigtambayayong sa One Championship alang sa pagpahigayon sa usa ka dakong fight card promotion sa ugma damlag diin magsagol ang mixed martial arts ug boksing.

Sa sayong bahin niadtong 2018, ang One misuway pag-imbitar kang boxing legend Manny Pacquiao nga moaway sa usa ka dakong promosyon niini apan wala kini mahinayon.

Ang ALA Promotions maoy puy-anan sa ubang dekalidad nga mga boksidor sa nasod sama nila ni three-division world champion Donnie “Ahas” Nietes, kanhi world flyweight champion Milan “El Metodico” Melindo, ug kanhi world super bantamweight contender “Prince” Albert Pagara.

Kon isagol ang mga nangahisgutan sa sikat nga Pinoyng MMA fighters sama nila ni Eduard Folayang ug Brandon Vera, hayan gilauman nga dugokon kini sa mga tawo.

“Definitely, yes. We’re always open to working with anyone, and ONE Championship has done a lot,” matod ni ALA Promotions president Michael Aldeguer sa interbyu sa ABS-CBN Sports.

Niadtong Oktubre, ang One nakapahigayon na’g promosyon nga gisagulan nila og boksing diin mibida si World Boxing Council (WBC) super flyweight champion Thai Srisaket Sor Rungvisai.

“They’ve done a great job now, and that was a great idea, what they did with Rungvisai,” dugang ni Aldeguer.

Ang ALA Promotions dili na sab bag-o sa pagpahigayon og dagkong promosyon sa boksing sa nasod.

Kaabag ang ABS-CBN, napahigayon sa ALA Promotions ang nabantog nga Pinoy Pride boxing series. ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph