NABAID na nako ang akong pinuti. Hait na kaayo kini. Kon duna koy buot tigbason o putlon segurado gyung kausa ra ug dili na kausban, labi nag inubanan kini sa kasuko o kaligutgot o kasilag nga daw ang dilaab sa dakong daob kansang kalayo may taas nga dila nga kadali rang motilap sa mga butang nga maoy buot sunugon sa kapintas. Apan wa koy tumong sa pagpanigbas kay ang akong tumong mao ang pagpangandam lang kanunay sa higayon nga ang berdugo molutos na sab kanako ug unya iya kong dumugon, sama sa iyang pagdumog kanako niadtong miaging gabii. Oo, gidumog ako sa berdugo nga walay ulo. Oo, walay ulo, kay bisag giunsa kog tan-aw ug tutok sa iyang bayhon wala gyud koy nakitang ulo. Hain man diay ang iyang ulo, ug nganong itom ug duna may puwa-puwa ang iyang mga kamot?
Bangis kining maong berdugo kay panahon sa kagabhion iya kong atakihon. Buot ko niyang kuniskunison sama sa iyang pagkuniskunis kang Paterno, ang higala kong ‘playwright’ nga maoy nagdasig kanako nga mahimo usab nga ‘playwright’ sama kaniya. Apan patay na si Paterno kay miambak gikan sa 10th Floor sa usa ka bilding. Maayong pagka buak ang iyang ulo. Matod pa niya nako, usa ka higayon niana, samtang nag-inom mi, duna kunoy usa ka Berdugo nga mopatay kaniya. Mangtas nga berdugo nga moataki kaniya panahon sa kagabhion.
“Mao kana, Diomedes. Ug matag gabii kanunay na niya akong lutuson. Wala akoy umoy o gahom sa pagsanta o pakigdumong kaniya. Apan dili ko siya pakyason sa iyang tuyo kanako samtang ania pa kanako ang akong ulo. Ug ikaw, duna ka nay orihinal alang sa bantawan, kay ako wala na. Nahadlok ko sa berdugo...” Ug miaslay ang alak dihang iyang gikalit pagyabo ang sulod sa botelya.
“Dili ko mahadlok sa Berdugo, higala. Duna koy hait nga pinuti nga kanunay nakong gibaid. Hait, lantip, kapanaminan ang kahait niini. Ug ang giingon mong berdugo putlan ko sa iyang uloooo!” Ug giyarok ko ang alak sulod sa baso.
SULOD sa akong lawak sa akong balay (kay ako rang usa ang nagpuyo) mibantang ang mga libro nilang Eugene O’Neill, Tennessee Williams, Arthur Miller ug Merwin, W.S., mga libro sa dula sa bantawan o teatro, sama ning mosunod nga mga ulohan sa libro: Death of a Salesman, The Price, After the Fall ni Arthur Miller; The Glass Menagerie ug Street Car Named Desire ni Tennessee Williams; Strange Interlude ug Emperor Jones ni Eugene O’Neill.
Unya may hangin nga mihuros ug nakapanguros ko kay hilabihang bugnawa. Tingali kalag kadto ni Paterno, apan naunsa man ko ron nga ingon sa dihay kainit nga migimaw sa akong tampihak ug mipuli ang kangitngit, dayon ang kahilom. Ug sa abli nga pultahan sa akong lawak misulod ang Berdugo nga walay ulo ug ako siyang gibatokan. Grabe ang kahilom. Gilanit ko dayon ang lantip nga pinuti sa akong handurawan ug gitigbas ko ang Berdugo sa kahilom nga way ulo. Unya luya akong mihigda sa akong kama. Ug dayon gidala ako sa Berdugo sa kahilom paingon ngadto sa dapit diin naghari ang labaw pang kahilom. (Katapusan)