NITALIWAN na sa laing kalibutan kagahapon sa kaadlawon si kanhi Cebu City Councilor Rogelio “Jingjing” Osmeña Sr. tungod sa sakit nga pneumonia.

Si Osmeña, 68, kinsa nahimo usab nga direktor sa Land Transportation Franchising and Regulatory Board (LTFRB) 7 ug nangu sa Cebu City Traffic Operations and Management (Citom), didto sa Perpetual Soccour Hospital namatay ala 1:30 sa kaadlawon kagahapon human sa usa ka semana niyang pag-estar sa tambalanan.

Click here for stories and updates on the Sinulog 2010 Festival.

Matod ni Cebu City Councilor Ritchie Osmeña, pag-umangkon ni Jingjing, nga nahinabi sa CCTN nga nag-LBM ang iyang uyoan ug naglisod pagginhawa busa gidala siya sa ospital niadtong Pebrero 2.Nalandig sa intensive care unit (ICU) sa hospital si Jingjing sukad niadtong Sabado.

Ang iyang igsuon nga si kanhi Cebu City Vice Mayor Renato “Nato” Osmeña nitug-an nga ang iyang igsuon may problema na sa panglawas sukad nipaubos sa kidney transplant upat ka tuig na ang nakalabay.

“He’s been having kidney problems and lately, his kidney failed so he suffered a cardiac arrest.

It was mainly his kidney but his heart could not stand it... I don’t think he knew he was going because just last Saturday, his doctors told us that he was improving very slowly,” saysay ni Nato.

Nitataw siya nga gawas nga maayong igsuon ang namatay, nipadayag siya nga si Jingjing maayo usab nga nag-alagad sa publiko ilabi na sa pagkakonsehal sa Cebu City North District.

Nasurprisa ang kasagaran sa mga opisyal sa dakbayan sa Sugbo ning kamatayon ni Jingjing kay wa sila siya masayod nga nalandig diay sa tambalanan.

Ang lawas karon sa konsehal anaa sa Cosmopolitan Funeral Homes sa Nivel Hills, Barangay Lahug, dakbayan sa Sugbo.

Gikatakda nga dad-on si Jingjing sa Cebu City Hall karong adlawa ug sa Biyernes ilubong siya sa Osmeña mausoleum.