NADAKPAN sa Highway Patrol Group (HPG) 7 ang duha ka mga lalake nga gidudahang ningkawat sa sakyanan nga gihimong Grab car ni Jiboy Alegado, ang drayber nga napalgang-patay sa Barangay Langub, lungsod sa Asturias niadtong Nobiyembre 13.
Niadtong Sabado, Disyembre 1, giila ang patay nga lawas ni Alegado ug gikuha sa iyang pamilya sa lungsod sa Sibonga.
Ang mga nadakpan giila nga sila si Anthony Dinawanaw Decierdo, 31, taga lungsod sa Manukan, Zamboanga del Norte apan kasamtangang nagpuyo sa dan Urgello, Barangay Sambag 1, siyudad sa Sugbo, ug Paul Christian Go, taga dan Urgello usab.
Si Supt. Hersan Mojica, deputy chief sa HPG-7, nagpanayon nga human maalarma sa Waterfront police station ug kapulisan sa Sibonga, ila dayong gipangita ang sakyanan nga Nissan Almera (OY 2428) nga nakapangalan ang rehistro ni Constantino Cuyos.
Niadtong Lunes, Disyembre 3, ilang gisuwayan sa pagtan-aw ang social media diin adunay mga second-hand nga sakyanan nga gibaligya ug nadani ang ilang atensiyon sa usa ka itom nga Nissan Almera nga susama sa gihatag nga description sa na missing nga sakyanan.
Gi-deal kini sa usa ka inilang online seller nga adunay presyo nga P379,000 ug gipakita pa nga kompleto kini sa rehistro lakip na ang hulagway sa miangkon nga tag-iya.
Apan lahi na kini og plate number nga OX 5377 apan susama og kolor nga itom nga gidrayban ni Alegado ug natingala sila gumikay kay na wagtang na ang conduction sticker niini.
Nagpatuo ang mga pulis nga mopalit sa maong sakyanan ilang gipakigkitaan ang dealer niini ug ang ilang sabot didto mag-abot sa Negros Road sa Ayala Business Park.
Sa pagka alas 7:00 sa gabii sa samang adlaw, nag-abot sila ug sa dihang gisusi ang chassis ug engine number niini, mitakdo kini sa official receipt (OR) ug certificate of registration (CR) sa sakyanan ni Cuyos.
Dinhi na nagpaila ang mga pulis nga sakop sila sa HPG 7 ug gipahibawo ang duha nga ang ilang gibaligya nga sakyanan kinawat.
“We arrested them for the possession of a stolen vehicle, sa kasong ito lang ang ipa-file natin sa kanila kase wala pa tayong ebidensya na sila talaga ang pumatay duon sa driver,” matod ni Supt. Hersan Mojica.
Gihimakak nila ni Go ug Decierdo nga sila ang nagkawat sa maong sakyanan sanglit giprenda ra usab kini sa ilaha niadtong Nobiyembre 9.
Gipugngan lang una sa HPG 7 ang pangalan sa giingong nagprenda kanila sanglit apil na kini sa person of interest.
Matod ni Paul Christian Go, ang sabot lukaton ra kini sa nag prenda kanila apan sa dihang ilang gitawgan ang cellular phone niini dili na kini ma contact nga maoy hinungdan nga nakadesisyon sila nga ibaligya nalang.
“Wala naman namo ma contact tung nagprenda maong nakadesisyon mi nga ibaligya nalang, wala koy idea anang nahitabo sa Asturias na shock nalang mi nga gipara mi,” matod ni Go.
Si Chief Insp. Roger Quijano ang hepe sa Asturias police station nakig-alayon sa HPG-7 alang sa pagpaubos sa duha ka dinakpan sa imbestigasyon.
Matod niya nga sa pagkakaron wala pa silay ebidensya nga sila ang nagpatay ni Jiboy Alegado.
“Ang among buhaton mao ang pagpangitag ebedensya kung sila ba gyud ang nagpatay atung driver nga gilabay didto sa Asturias,” matod ni Chief Insp. Roger Quijano.
Apan si Marites Alegado positibo na nga silang Go ug Decierdo mao ang nagpatay sa iyang bana ug ang tuyo mao ra ang pagkawat sa sakyanan.
“Mao gyud na sila, Sir, kay ang tuyo ana nila mao gyud ang sakyanan. Okey lang unta to nga gikuha ra niya ang sakyanan wala lang unta niya unsaa ang akung bana,” matod ni Marites Alegado.
Kagahapon, Disyembre 4, gi-inquest na sa piskalya sa probinsya sa Sugbo ang duha ka mga dinakpan sa kaso sa pagpangawat sa sakyanan.
Samtang, ang Superbalita Cebu nikontak sa Grab Phiippines apan nagdumili sa pagluwat og pamahayag bahin sa hitabo.
Si Khizzy Pasigan, PR manager sa Grab Philippines, nagkanayon nga dili sila pwede moluwat sa publiko sa bahin sa inpormasyon sa ilang mga drayber ug confidential kini.
“About the victim’s last transaction, we can only give this to the police upon request. We will cooperate with the police to supply the needed information to speed up the investigation. I’m afraid that we cannot share this information publicly as of the moment as it may affect ongoing negotiation,” matod ni Pasigan.
Apan nipasalig siya nga motabang sa ilang driver partners ug mga pasahero.
“We are running our own internal investigation on the issue,” dason niya. AYB