PAREHONG nagtuo silang Gob. Hilario Davide III ug Bise Gob. Agnes Magpale nga nag-joke ug nagbino-ang lang si Presidente Rodrigo Duterte dihang nangangkon kini nga mohithit siya og marijuana.
Si Davide nagtuo nga dunay gamay’ng “inappropriateness” sa gihimo sa presidente, ilabi na kay dunay mga naminaw ug nagtan-aw kaniya nga audience ug labaw sa tanan, siya ang nawong sa kampaniya kontra droga sa iyang administrasyon.
Sa usa ka pagpakigpulong niadong Lunes, gipasabot ni Duterte nganong nakapalta siya og pipila key meetings sa Association of Southeast Asian Nations Summit sa Singapore.
Matod niya, mogamit siya og marijuana aron magpabiling nagmata ug makaapas sa iyang grabeng schedule.
Dugang sa presidente, joke ra kini ug wala’y makapugong kaniya sa paghimo sa ingon. Ang nituo kaniya gihulagway niya nga “stupid”.
Sigun sa Malacanang, entitled sa pagpasi-aw ang presidente ug ang maong pamahayag wala magpasabot nga mahimo na dayon siya nga usa ka dautang lider
Nituo silang Davide ug Magpale nga nag-joke lang gyud ang si Duterte dihang namahayag siya niini.
Matod ni Davide, nga sa pangidaron ni Duterte, imposible nga mosulod o mag apil-apil pa kini sa maong matang sa bisyo.
“Di ko motuo nga mogamit siya’g marijuana. Bino-ang ra gyud to. Komedya ra gyud to,” padayag ni Davide.
“I think it was really just a joke. Joker man gyud na siya kaayo. Diba, so many time he would say things,” si Magpale niingon.
Nagtuo si Davide nga dunay gamay nga “inappropriateness” sa pagpadayag sa presidente sa maong bino-ang.
Matod niya, nga isip presidente daghan ang naminaw ug nagtan-aw kaniya, sama na lang sa mga batan-on.
Gawas niini, hugot nga gikampaniya sa iyang administrasyon ang pagbatok sa ilegal nga drugas ug dili makatabang kung magbinoang lang siya sa iyang mga pamahayag nga may kalabutan sa drugas.
“Duna tingali gamay nga inappropriateness noh, kay he was talking to an audience, ASEAN organizers man to. Maybe ang uban, lain ug idea ba, specially the youth maybe. Okay ra diay mag-marijuana, ang presidente gani mag-marijuana man,” niingon si Davide. AZLG