MOABOT ngadto sa P5.2 million nga balor sa illegal nga drugas ang nasakmit sa Waterfront police station gikan sa duha ka mga buy-bust operation ganihang kaadlawon sa Huwebes, Disyembre 6.
Ang unang operation gilusad alas 2:30 ganinang buntag sa 13th Avenue, luyo sa usa ka mall sa barangay Tejero, Cebu City.
Ilang nadakpan ang duha ka big time drug personalities nga silang John Michael Burgas, 29, taga Sitio Kamagong, Barangay Lahug ug Bryan Antolihao, 34, taga Barangay Budlaan, syudad sa Sugbo.
Nakuha gikan kanila ang 275 gramos nga shabu nga gibana-bana nga mobalor og P3,245,000.
Pagka alas 4:30 ganinang kaadlawon, didto sa MJ Cuenco Avenue, duol sa Museo Sugbo, nasikop usab nila ang usa ka Johnny Boy Augusto, 29, taga sitio Mahusay, Barangay Subangdako, siyudad sa Mandaue.
Nakuha gikan kaniya ang 175 gramos sa gituohang shabu nga mobalor og P2,065,000.
Ang mga suspek gipaubos pa sa imbestigasyon kon asa gikan ang ilang supply sa drugas nga gibaligya sa Sugbo. (Arnold Y. Bustamante/ Superbalita Cebu)