NASIKOP ang laing duha ka mga lalaki nga misulay sa pagpanuhol sa tinugyanan sa Highway Patrol Group (HPG)-Northern Mindanao bugti sa sakyanan nga nadakpan niadtong Disyembre 5 diha sa Upper Carmen ning siyudad sa Cagayan de Oro.
Unang nasikop si Gary Ranalan nga taga Barangay Lumbia ning siyudad samtang ang ikaduha mao si Franklin Jhon Ramos nga taga Barangay Kauswagan ning siyudad.
Nasayran nga gi-flagged down sa tinugyanan sa HPG ang sakyanan nga gimaneho ni Ranalan nga Toyota vios Sedan nga kolor itom ug nagdala sa numero sa plaka nga VFB793 sa inisyal nga pagsupak sa bala-od diin walay Land Transportation Office (LTO) sticker CY 2018 ug nasutang expired na kini hinungdan nga gi-isyuhan og impounding receipt.
Giingong nakurat na lamang kini sa dihang nibalik mga alas 11:00 sa buntag si Ranalan ug misulay sa pagsuhol ngadto na kay Senior Police Officer 1 (SPO1) Sarge Maceren bugti sa pagbuhi sa sakyanan hinungdan nga gisikop gyud dayon kini.
Samtang si Ramos usab ang dunay kalapasan nga walay LTO sticker ug unauthorized plate number ug walay pagtugot sa LTO kinsa nibalik usab sa ilang opisina ug misulay sa pagtunol og usa ka libo.
Ang maong mga suspetsado ang kasamtangang anaa sa buhatan sa HPG ug posibleng pasakaan og kaso nga paglapas sa Article 212 sa corruption of public official.