KUMPIRMADONG mahitabo sa nagkadaiyang lungsod sa lalawigan sa Misamis Oriental ang gikahinaman ug gi-atngan nga Kuyamis Festival alang sa tuig 2019.
Kini ang pagkumpirma ni lawyer Jeffrey Saclot kinsa Provincial Tourism Department Head human giusa-usa nga mahitabo ug matigayon ang matag gabii nga kalihokan sa Kuyamis Festival sa nagkadaiyang lungsod sa lalawigan.
“We identified venues already and it is quite different this time because we are doing our nightly activities in different municipalities.” Matud ni Saclot.
Gibutyag niini nga sa Enero 7 ngadto 9 ipahigayon ang cultural night presentation nga bahinon sa tulo ka cluster sa munisipyo. Unang gabii, ikaduha ug ikatulo mahitabo sa lungsod sa Binuangan, Tagoloan ug Initao.
Sa petsa 10 matigayon ang Miss Kuyamis 2019 coronation night samtang sa umaabot Disyembre 29 sa alas 3 sa hapon mahitabo ang Swimsuit Competition sa Lohas Hotel sa lungsod sa Laguindingan, Misamis Oriental.
Magpabilin dinhi sa hawanan sa kapitolyo probinsya ang mga booth lakip ang farmers market diin sa petsa 7 sa buntag pagabuksan ang dakong kalihokan.
Sa mga pasiunang interbyu ngadto kang Misamis Oriental Governor Yevgeny Vincente Emano, iyang gibutyag nga giusab nila nga sa laing lugar himoun ang kalihokan aron mas maila ang nagkadaiyang lungsod ug makasuroy ang Misamisnon sa ilang lugar. (SVB)