NALIT-AG ang usa ka konsehal sa munisipyo sa Manay, Davao Oriental sa mga sakop sa Task Force Davao samtang nagmuntar og checkpoint didto sa Sitio Licanan, Barangay Lasang, Bunawan District ning dakbayan sa Davao human nakuhaan og mga kahimanan sa druga samtang pasulod unta sa dakbayan.
Si TFD commander Colone Nolasco Mempin nag-ila sa suspek nga si Eugene Rhoy Balante, 27, minyo, molupyo sa Purok 6, Central Manay sa nahisgutang probinsiya.
Nakuha gikan kaniya ang tulo ka buok nga walay sulod nga sachets nga dunay lama sa gituohang shabu; duha ka buok nga improvised glass tube, duha ka lighters ug usa ka buok improvised nga dagum.
Nadakpan si Balante niadtong Miyerkules sa hapon samtang ang 1st squad sa Lasang Detachment, Task Group Lawin mihimo og checkpoint kon asa ilang nadakpan ang opisyal sa gobyerno.
Base sa taho, ang suspek sakay sa Private Utility Van (PUV) nga dunay plaka numero LGW 896, kolor gray gikan Manay padulong sa dakbayan sa Davao.
Atol sa pagsusi sa lugar, mihangyo ang TFD nga lilion ang itom nga sling bag sa suspek nga gibutang tapad kaniya ug nasayran nga positibo kini sa gituohang shabu ug uban pang gamit.
Si Balante ug mga butang gitunol na ngadto sa Bunawan Police Station alang sa saktong disposisyon ug mga kaso nga ipasaka batok kaniya. (JCR)