GIHATAGAN og 48 ka oras sa Provincial Health Office ang duha ka mga doktor sa Cebu Provincial Health Hospital sa dakbayan sa Danao sa pagtubag labot sa pagkamatay sa 3 anyos nga batang lalake nga giingong nagkasakit og dengue.
Matod ni Dr. Rene Catan, pangu sa PHO, nga naghuwat siya sa opisyal nga tubag sa mga doktor.
“Ganahan ko on record makadawat ko sa ilang tubag within 48 hours,” sumala niini.
Si Catan nipasabot nga wa dayon admita sa ospital ang bata kay base sa assessment sa doktor di pa kini angay nga i-admit subay sa iyang naobserbahan niini.
Niadtong 29, namatay si James Francis Gulfan, nga magsaulog unta sa ikaupat nga kasumaran sa iyang adlaw nga natawhan karong adlawa, Disyembre 7 human giingong na-dengue.
Sigon sa iyang inahan, Aireen Manipis, taga Poblacion, Carmen, gihilantan og sugod ang iyang anak niadtong Nobiyembre 25 ug pagka sunod adlaw, gidala kini sa health center ug gitambagan nga ipa-complete blood count (CBC).
Sa unang CBC, nagpositibo ang bata sa dengue ug naa sa 242 ang platelet count niini hinungdan nga nitambag ang doctor sa health center sa ginikanan nga ipa-admit sa tambalanan si James Francis.
Asoy ni Aireen, gidala dayon nila ang bata sa CPH-Danao apan giingong wa ipa-admit ang bata.
Sumala ni Catan, nga base sa naobserbahan sa doktor dihang naabot ang bata sa ospital niadtong Nobiyembre 26, “okay ra ang bata physically, clinically, motutoy man. Ang iyahang platelet taas, 249 which is adequate.”
Apan nagkaubos ang platelet count niini sa paglabay sa mga adlaw. Nahimo na kining 149 pagka Martes sa buntag, Nobiyembre 27, ug nikanaug sa 103 ang ihap sa platelet pagka gabii sa samang adlaw.
Apan bisan pa niini, sumala sa inahan giingong nagdumili gihapon pag-admit ang doctor nga nag-duty sa night-shift sa Emergency Room sa CPH-Danao ug wa usab padekstrosi ang bata.
Pagka Miyerkules sa buntag, nikunhod sa 69 ang platelet count sa bata hinungdan nga nangusog sila nga ipa-admit kini.
Pagka gabii sa Miyerkules, mas niubos sa 49 ang platelet count sa bata ug nahimo na lang nga 19 pagka Huwebes sa buntag, Nobiyembre 29 diin sa maong adlaw, nisakit og maayo ang tiyan sa bata.
Gitataw ni Catan nga wala papahawa sa ospital ang bata ug ang mga nagbantay niini ug giatiman usab kini sa Emergency Room. “Wala oi! Dili ta makapapahawa ana kay mandato nato, kay bisan kinsa dawaton kon kinahanglan dawaton,” dugang sa pangu sa PHO.