MOBALOR og P5.2 milyunes nga gidiling drugas nasakmit sa Waterfront police station atol sa duha ka buy-bust operations sa managlahing lugar sa Sugbo kagahapon, Disyembre 6, sa sayong buntag.
Ang unang anti-drug operations gilusad alas 2:30 sa buntag sa 13th Avenue luyo sa usa ka mall sa Barangay Tejero diin ilang nadakpan ang duha ka big time drug personalities nga silang John Michael Burgas, 29, taga Sitio Kamagong, Barangay Lahug ug Bryan Antolihao, 34, taga Budlaan sa siyudad sa Sugbo.
Nakuha gikan kanila ang 275 gramos nga shabu nga gibanabana nga balor og P3,245,000.
Pagka alas 4:30 sa buntag didto sa MJ Cuenco Avenue duol sa Museo Sugbo nasikop usab ang usa ka Johnny “Boy” Augusto, 29, taga sitio Mahusay sa Barangay Subangdako, siyudad sa Mandaue.
Nakuha gikan kaniya ang 175 gramos nga gituohang shabu nga mobalor sa kapin sa P2,065,000.
Matod ni Sr. Insp. Joemar Pomarejos, hepe sa Waterfront police station, nga human nila madakpan si Burgas mitug-an kini kung kinsa pa ang iyang kauban sa ilegal nga negosyo.
Human mahatag niini ang pangalan og phone number. mihimo dayon sila’g follow up operation nga mi resulta sa pagkasikop ni Ausguto.
Miabot sa tulo ka semana nga gipanid-an sa mga operatiba sa station 3 ang ilegal nga kalihukan ni Burgas sa dihang nakadawat sila og report gikan sa barangay opisyal sa Tejero nga naa sa luyo sa mall maghagbongan sa drugas ang mga suspek.
Sa dihang nasuta nga tinuod ang gitug-an sa barangay milusad dayon sila og buy-bust operation.
Ang mga dinakpan gipaubos pa sa imbestigasyon kung asa gikan ang ilang supply sa drugas nga gibaligya sa Sugbo.
Gitug-an matod pa sa mga dinakpan nga adunay wala nila mailhing tawo nga manawag nga adunay moabot nga butang kanila nga giingong gikan sa kaulohan.
Ang maong tawo matod pa naa nabilanggo sa Cebu City Jail apan wala nila kini mailhi.
“Ang ga padagan sa ilang movement ang naa sa sulod sa jail, tawag-tawag lang, ingnun ra nga ikaw adto ka anang lugara nya ang ilaha contact numbers lang wala sila kaila,” matod ni Sr. Insp. Joemar Pomarejos.
Gihulagway ni Pomarejos nga lawom ang koneksyon sa mga dinakpan sa usa ka drug group nga naglihok sa Metro Cebu nga ilang himoan og lawom usab nga imbestigasyon sa maong kaso.