KANHI traffic enforcer sa dakbayan sa Mandaue ang napusilan-patay sa kapulisan human giingong' nisukol atol sa gipahigayon nga buy-bust operation pasado alas 7 Huwebes sa gabii, December 6, sa sitio Villamanga Barangay Opao, syudad sa Mandaue.

Ang napatay kinsa maoy subject sa drug bust mao si Eduardo Baclohan, 32 anyos, molupyo sa maong dapit.

Matud ni Police Senior Inspector James Conaco, hepe sa Opao Police Station, nga nakadawat sila og taho kalabot sa pagpamaligya niini og shabu, hinungdan nga gihimo ang pipila ka semana nga surveillance ug kagabii gihimo ang buy-bust operation.

Giingon nga sa dihang' nakamatikud kini nga police ang gi-transaction, nidagan kini palayo ug dayon bunot og armas.

Ang back-up nga police nga nakabantay ang dali nga nakapusil-igo ngadto kang Baclohan.

Dali kini nga gidala sa tambalanan, apan gideklarar nga dead on arrival.

Si Baclohan ang gitaktak pagka-sakop sa Traffic Enforcement Agency of Mandaue kon Team sayo ning tuiga.