PATAY ang usa ka lalaki human misukol sa kapulisan ug nang-hostage pa atol unta sa pagsilbi sa warant of arrest batok kaniya, Huwebes sa gabii sa Isla Verde, Barangay 23-C, Poblacion, Davao City.
Sa report nga gipagula sa Davao City Police Office (DCPO), giila ang suspek nga usa ka Jeff Ross Villaroya Guday, alyas Hapon, 35 ug temporaryo nga nanimuyo sa maong dapit.
Una pa ang insidente, buot unta isilbi sa mga sakop sa Sta. Ana Police Station ang warrant of arrest batok sa suspek gumikan sa kasong kawat, apan kalit siyang midagan pasaka sa kuwarto sa balay nga iyang giabangan.
Gisundan kini sa kapulisan dihang nakorner, naggunit na og kalibre .38 nga revolver ang suspek ug buot unta pusilon ang pulis nga modakop kaniya, apan maayo na lang kay abtik nga nakalikay ang pulis.
Gumikan kay naay armas, napusilan sa pulis ang suspek, apan bisan samdan, midagan pa ang suspek pasulod sa sudlunon nga bahin sa lugar, diin pag-abot sa usa ka tindahan iyang giingong gi-hostage ang usa ka 20-anyos nga babaye.
Gumikan kay nakita sa awtoridad ang ka delikado sa sitwasiyon napugos sila sa subling pagpusil sa suspek hangtud nakaikyas ang hostage ug naluwas.
Human sa insidente, gidala ang suspek sa ospital apan gideklara kining dead on arrival sa mga doktor.
Nakuha gikan sa posisyon sa suspek ang kalibre .38 nga armas usa ka basiyo ug lima ka mga buhing bala.
Dugang nasayran nga nag-atubang sab diay og kasong kalapasan sa ilegal nga druga ang suspek, ug nalambigit sa pipila ka kaso sa robbery, hold-up, salisi ug akyat-bahay sa mga lugar sa Toril ug Tugbok ang napatay.