COTABATO CITY -- Gikalipay sa mga opisyal ug miyembro sa United Bangsamoro Justice Party (UBJP) sa Moro Islamic Liberation Front (MILF) ang pagtudlo ni Presidente Rodrigo Duterte kang Armed Forces of the Philippine (AFP) Chief of Staff Lieutenant General Carlito Galvez isip sunod nga mangulo sa buhatan sa Presidential Adviser on the Peace Process.
Gibutyag ni UBJP Secretary-General Sammy Almansoor nga napamatud-an na ang kinasing-kasing nga pagsuporta ni Galvez sa panghinabing pangkalinaw sa Mindanao ug Bangsamoro Organic Law.
Personal nga gipahibalo ni Galvez kang Almansoor nga kung matapos na siya sa iyang trabaho sa Armadong Kusog sa Pilipinas, ibubo niini ang iyang panahon sa Bangsamoro.
Una nang giimbita ni Galvez si MILF Chairman Alhaj Murad Ebrahim, Almansoor ug uban nga miyembro sa Central Committee sa kampo Aguinaldo niadtong Nobyembre 19.
Kahinumdoman nga pinakauna nga nahitabo sa sugilanon sa nasud nga ang pinakataas nga opisyal sa militar nga si Galvez mibisita sa Camp Darapanan pinakadakong kampo sa MILF sa Mindanao.
Ang maayong relasyon ni Galvez nagsugod dugay na sa diha nga siya ang nangulo sa GPH Coordinating Committee on the Cessation of Hostilities.
Nangulo sab si Galvez sa Army's 6th Infantry Division, Western Mindanao Command una nahimong AFP chief of staff niadtong bulan sa Abril. (Edgar E. Fuerzas)