NAKAPIYANSA og mokabat P40 mil alang sa iyang temporaryo nga kagawasan ang municipal councilor sa Manay, Davao Oriental nga si Eugene Rhoy Balante human kini nasikop sa Task Force (TF) Davao checkpoint sa Licanan, Bunawan District Davao City, niadtong Huwebes.
Kini ang gibutyag ni Police Chief Inspector (PCI) Estrello Ramiso, hepe sa Bunawan Police Station, human niadtong adlaw'ng Biyernes, Disyembre 8, gilayong mipiyansa si Balante.
“Nakapiyansa siya [Balante], og P4,000, kay paraphernalia ug residue lang man ang nakuha, ug di pod siya subject sa buy-bust,” ingon ni Ramiso sa pakighinabi sa SuperBalita, pinaagi sa telepono Sabado.
Una niini, nagpositibo sa paggamit sa ilegal nga druga si Balante human kini gipailawom sa drug testing una kini gi-inquest didto sa korte.
Dugang ni PCI Ramiso nga miangkon ang suspek nga naggamit kini og ilegal nga druga.
Giingon sa suspek nga wala siya mamaligya og druga.
“Yes miangkon siya nga gagamit siya, ug napamatud-an pod sa drug test, kay positive man siya,” dugang sa opisyal sa Bunawan PNP.
Gibutyag sab ni TF-Davao commander Col. Nolasco Mempin, nga sakay sa passenger van ang suspek padung Davao City.
Pag-abot sa TF-Davao checkpoint girekisa ang mga gamit sa suspek sud sa iyang dala nga sling bag ug didto narekober ang giingong tulo ka basiyo sa pakete sa ilegal nga druga ug lakip sa nakuha ang mga drug paraphernalia.
Sumala ni Ret. Senior Supt. Antonio Rivera, Philippine Drug Enforcement Agency (PDEA) Davao Region director, nga bag-o ang suspek sa ilang listahan apan gikonsidera gihapon nila kining anaa sa lebel nga high-value target gumikan sa iyang posisyon sa politika.
Pakyas ang SuperBalita Davao nga makuha ang pamahayag ni Balante sanglit ginahulat niini ang mandu sa iyang mga abogado.