Umento way ayo

DIHANG nimando si Cebu City Mayor Tomas Osmeña sa higpit nga pagpatuman sa balaud batok sa counterflowing ug sa pag-impound og usa ka buwan sa mga sakyanan, kansang mga drayber nakalapas, daghan ang nangadakpan ug nangatanggong ang mga sakyanan.

Ang dugay nang di maayong batasan sa daghang mga drayber, labina sa mga tigmotorsiklo ug tig scooter, nasulbad. Daghan na ang nangahadlok sa pag counterflow sa trapiko. Daghan ang ning-untol tungod sa kabug-at sa silot.

Pipila ka buwan ang minglabay, naundang ang higpit nga kampanya batok sa counterflowing. Hilom ang Cebu City Transportation Office (CCTO) ug si Mayor Tomas Osmeña nganong naundang ang mao nga kampanya. Hayan nadala siya sa pressure sa mao nga sektor nga maoy naigo og maayo sa iyang kampanya.

Karon, gusto na sab sa mayor nga i-triple ang multa sa mga kalapasan sa balaud sa trapiko sa Siyudad. Gikan sa P1,000, himuon na kining P3,000. Gihulagway ni Bise Mayor Edgardo Labella nga anti poor ang mao nga lakang kay sagad sa makamulta gud ini mao ang mga kabus, yanong mga lungsoranon.

Gawas nga uyon ko ni Labella niini, alang nako wa na kinahanglana pang usbawan kini. Kon duna may nibalik na usab sa paglapas, kini tungod ra usab sa kapakyas sa pagpatuman sa CCTO sa balaud sa trapiko. Kon kada adlaw pa higpit nga gipatuman ang balaud sa trapiko, sama no counterflow, mangahadlok ang mga malapason. Apan kay maora mag tiempo tiempo ang pagpatuman, mobalik ra gihapon ang pagsiaw.

Consistent

Kon kanunay pa ang pagpatuman sa balaud, duna pa ba kahay ganahan nga molapas. Kini gung dagkong multa di makapahadlok kon way enforcement. Kana bitawng no entry sa mga karsada, pila man gyud ang multa niana? Dako baya, P6,000. Kon ang mga personnel sa Land Transportation Office (LTO) mopatuman ini bisan sa random nga mga dapit apan kanunay, ambot duna pa bay morisgo sa pagsulod og one-way nga karsada.

Bisan gani sa kolurum nga dagko ang multa kay moabot og P200,000 ngadto sa P1 million daghan pa ang naglapas kay lagi, kuwang sa pagpatuman. Busa wa lang sa multa ang kahadlok, kon di sa pagpatuman.

Way traffic lights

Dihang namakasyon mi sa akong asawa og mga tulo ka adlaw sa Dumaguete City, iyang nabantayan nga way traffic lights sa siyudad.” Way uso ang traffic lights dinhi,” matod niya.

Iyang nabantayan nga dunay mga bahin nga hinay tuod ang dagan sa trapiko, pero di magdugay makaagi rang mga sakyanan kay mag-iyahay sila og giveway. Lahi kaayo dinhi sa Sugbo kay magbusinahay ug magsininggitay sa karsada.

Kanindot kon ang mga drayber sa Sugbo pareho sa Dumaguete city, gentle kaayo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph