ANG kasaulogan sa kapistahan sa Birhen sa Immaculada Conception nagpahinumdum sa katawhan sa reyalidad sa sala dinhi sa kalibutan, nga sa samang higayon nagpahinumdum usab kon unsa ka mas gamhanan ang gugma sa Diyos kon itandi sa sala, sumala ni Cebu Archbishop Jose Palma.
Kini ang gipahimug-atan sa arsobispo sa iyang wali sa misa sa kapistahan sa Our Lady of Immaculate Conception sa Sabado, Disyembre 8, sa Cebu Metropolitan Cathedral.
Matod ni Palma, gipahinumduman ang mga tawo nga diha sa reyalidad sa sala naa ang “core-ruption” nga nagpasabot ang core mao ang kasingkasing ug ruption ang pagkabuak sa kasingkasing.
Sigon niini sa higayon nga modistansya o mopalayo ang mga tawo gikan sa Ginuo, diha magsugod ang sala ug ang bunga gikan sa “core-ruption” diha masayran ang mga dautan nga epekto sa kasingkasing.
Siya nipasabot nga diha sa pagpalayo sa mga tawo sa Diyos moresulta kini sa bati nga binuhatan ug pagkabungkag sa mga relasyon.
Sa iyang wali, si Palma nipunto nga ang mga tawo kon makasala, basulon dayon ang ubang mga tawo sama sa pagbasol ni Adan kang Eba dihang nasakpan kini nga nikaon sa prutas nga gidili sa Ginuo kanila diin natintal sila sa bitin.
“We blame with another one, we find fault with other persons,” sumala sa arsobispo kinsa nidugang nga dili na makita ang maayong mga buhat nga nahimo sa uban kondili ang mga bati na lang gumikan sa pagbinasolay.
Apan bisan sa sala, matod niya, ang gugma sa Ginuo nag-awhag sa mga tawo nga mobalik ug mosalig Niya.
Siya nidugang dili angay mahadlok ang mga tawo sa Ginuo kay ang unang imahen Niini mao ang imahen sa Sto. Niño diin naila ang mga Sugboanon nga mga deboto niini.
“Bisan pa og dunay sala, ang gugma sa Diyos mas kusog, mas gamhanan, mas powerful kaysa sala...Kinsa man ang mahadlok motan-aw sa nawong sa Sto. Niño, ang bato balani sa gugma,” dugang pagpasabot ni Palma.
Si Palma nidugang nga angay pasalamatan si Mama Mary, ang babaye nga walay sala nga sulundon nga dili lang inahan ni Jesuskristo kondili inahan sa tanan. SCG