Sulti ni Duterte batok sa mga obispo 'bad joke': Palma

GIPAKAGAMAY lang ni Cebu Archbishop Jose Palma ang bag-ong patutsada ni Presidente Rodrigo Duterte batok sa mga obispo sa simbahang Katoliko.

Gihulagway sa pangulo sa nasud nga way silbi ug angay patyon ang mga obispo sa Katolikong simbahan.

“Tong mga obispo ninyo, patayin ninyo. Walang silbi iyang mga gagong iyan. All they do is criticize,” pamahayag ni Duterte sa dihang’ nihatag og mensahe atol sa awarding ceremonies alang sa 2017 Presidential Award for Child-Friendly Municipalities and Cities (PACFMC) sa Malacañang, niadtong Disyembre 5.

Gikataw-an lang sa 68-anyos nga obispo ang iyang gihulagway nga ‘bad joke’ ni Duterte.

“Mo(ka)tawa raman kami kay para namo noh, normally ang mga tawo nga normal ba, di gyud moingon.. kay sa giingon pa man ni Panelo, nga he is joking,” saysay ni Palma.

“Kinsa man nga tawo dinhi na in his right mind moingon nga ipapatay kining grupo.. what I mean, siguro it’s a bad joke,” dugang ni Palma.

Pagklaro sa arsobispo nga wa siya mabalaka sa maong pamahayag kay wa usab sila kakitag rason nga silang mga obispo angay patyon.

“There is nothing to be afraid of, wala man.. What have we done to deserve to be killed?,” nakatawa nga pangutana ni Palma, atol sa interview sa mga tigbalita human sa iyang pagpangulo sa santos nga misa alang sa kapistahan sa Immaculada Conception sa Cebu Metropolitan Cathedral kagahapon, Disyembre 8.

Sunod-sunod na nga nihimo og mga verbal nga pagpangatake si Duterte sa mga Catholic bishops, kinsa una na nga nibutyag nga lahi ang iyang gituohan nga Ginuo kay sa gituohan nga Ginuo sa mga Katoliko.

Gani iyang gitawag nga ‘stupid’ ang Ginuo sa Katoliko ug nga ang mga kritiko diha sa simbahang Katoliko ang ‘the most hypocritical institution’.

Ang padayon nga pag-ampo alang sa Presidente sa nasud ang awhag ni Bishop Palma ngadto sa mga Katoliko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph