Barrita: Pagkonbikto sa plunder, ang nakawat mauli pa?

GIPAKANAUG niadtong Biyernes, Disyembre 7, ang labing unang hukom mahitungod sa P10 bilyones nga pork barrel scam sa mga magbabalaod nga gipasiugdahan ni magpapatigayon Janet Lim-Napoles. Ang resulta - konbiktado si Napoles ug si Atty. Richard Cambe, legislative officer ni kanhi Sen. Bong Revilla.

Sumala sa Sandiganbayan, si Napoles ug si Cambe nibulsa sa P124.5 milyones gikan sa Priority Development Assistance Fund (PDAF) ni Revilla. Gihukman silang sad-an sa kasong plunder ug gipahamtangan sa silot nga reclusion perpetua kon pagkabilanggo hangtod sa 40 ka tuig.

Apan si Revilla giabsuwelto: “For failure of the prosecution to establish beyond reasonable doubt that accused Ramon ‘Bong’ Revilla Jr. received, directly or indirectly, the rebates, commission and kickbacks from his PDAF, the court cannot hold him liable for the crime of plunder. Accordingly, he is acquitted.”

• • •

Ang Office of the Ombudsman miakusar nga nakadawat si Revilla og P224.5-milyones nga kickback gikan sa iyang PDAF nga nahipunta sa ghost projects sa foundations ni Napoles gikan sa 2006 ngadto sa 2010. Apan sa boto nga 3-2, ang Sandiganbayan Special First Division niingon nga wa kini paprobar.

Ang naprobar sa prosecutors mao nga si Cambe nakadawat og P124.5 milyones gikan kang Napoles, sumala sa records sa financial ledgers ni star witness Benhur Luy. Ang naprobahan diha ra kutob ni Cambe. Wa maprobahi nga ang niabot kang Revilla.

Ang pangutana karon, mabawi pa kaha ang minilyon ka pesos nga nakawat gikan sa panudlanan sa kagamhanan nga buhis sa katawhan?

• • •

Ang 186 ka pahinan nga desisyon nagmando sa mga akusado sa pag-uli sa P124.5 milyones nga kickback ngadto sa nasudnong panudlanan. Ang gigamit nga termino akusado, buot ipasabot, lakip sila tulo si Revilla, Cambe ug Napoles.

Si Revilla naabsuwelto pero paulion sa kinawat. Ngano kini? Tungod kay ang giingong Sandiganbayan ang iyang krimen nga maprobahi sa way makatarunganon nga pagduda, beyond reasonable doubt.