SA WALA pa siya mahimong Presidente sa atong nasud, daan nang walay gusto si Mayor Rodrigo Duterte sa America sa dihang dunay bomba nga mibusikad sa usa ka hotel sa dalang Uyanguren dakbayan sa Davao pipila na katuig ang milabay.
Ang maong hitabo naglambigit sa usa miyembro sa Central Intelligent Agency (CIA) nga naunay sa iyang dala nga bomba, ug nadala sa Davao Doctors Hospital, apan gi-rescue sa iyang mga kaubanan ug walay nanubag sa maong panghitabo.
Gisundan pa kini sa dihang moadto unta sa America ang atong mayor, aron pagtambong sa pagkatawo sa ilang anak ni Honeylet nga si Veronica, apan gideklara siya sa America nga “persona non grata” mao nga wala intawon makatambong ang amahan. Ikaw, og maoy ingnon ini malipay kaha ka?
Tungod lang ba, kay gustong hatagan sa mayor og hustisya ang gibuhat sa ilang miyembro sa CIA dinhi sa Davao nga kung unsay misyon, kitang tanan wala masayud, pero gusto nila nga dili manubag sa sala nga gihimo niini?
Karon, sa wala damhang hitabo, tungod kay kapalaran ni Mayor Rodrigo Roa Duterte nga mahimong presidente, murag ang America na ang naggukod-gukod sa atong presidente, aron lang manumbalik ang pagsalig kanila, karon makatarunganon ba, nga si Duterte dili gusto sa America?
Karon, nahimong sunod-sunoran sila og unsay gusto sa presidente; sa dihang gisingil sila sa atong pangulo nga i-uli ang Balangiga bell, nga ilang gikawat sud na sa 117 ka tuig ang milabay, nan moabot na kini ugmang adlawa diri sa atong nasud, -- butang nga gikalipay sa lungsod sa Balangiga probinsya sa Samar, ug tingali gikalipay usab kini sa simbahang Katolika.
Ang America padayon nilang suportahan ang usa ka nasud kung duna sila'y dakong interes, pero kung wala na, pasagdan kana nila nga sama sa nasud Iraq kunuhay gigubat nila kay nagsuporta kuno si Saddam Hussein sa International terrorist nga si Osama bin Laden pero ang tinuod gusto nilang kontrolon ang tinubdan sa lana sa maong nasud.
Karon magamit sa America ang West Philippine Sea, sa higayon nga mopabor na kita sa ila, modeklara na ang America og gubat batok sa China nga nagpakita lamang nga gamhanan kaayo ang America.
Husto gyud diay atong mahal nga pangulo nga dili ta magdali-dali, ug walay dautan kung makighigala kita sa China, ang importante lang, dili kita matakdan sa ilang gobyernong komunista kay di kana madawat nato.