BISAN sa apelar sa mga heritage advocate kang Cebu Archbishop Jose Palma, gub-on gihapon ang Patria de Cebu building.
Matod sa arsobispo, delikado ug karaan na ang edipisyo sa Patria de Cebu, basi sa gisulti ngadto niya sa diocesan committee nga maoy nagtan-aw alang sa pagpaabang sa luna nga kasamtangan gibarugan sa edipisyo sa Patria ngadto sa Cebu Landmasters Inc. (CLI).
“.. there are degrees of being heritage, of being historical with the passing of time. While it has meaning for many, pero for our committee it has reached the point nga dangerous naman daw no kay karaan na gyud man,” sumala ni Palma dihang nahinabi sa mga tigbalita niadtong Sabado, Disyembre 8.
Nadawat na niya ang suwat gikan nila ni Architect Melva Java ug Eileen Mangubat, kanhi editor sa usa ka mantalaan ug gipasa niya kini ngadto sa CLI, ang contractor nga mohimo sa pagpalambo sa propiyedad nga gibarugan karon sa Patria.
Sa suwat, nihangyo sila si Java ug Mangubat, mga miyembro sa Archdiocese Commission on Cultural Heritage of the Church, sa arsobispo nga dili itugot ang pagguba sa Patria de Cebu tungod sa heritage ug historical value.
Si Java nisugyot og alternatibong desinyo nga ma-preserve ang daan nga edipisyo sa samang higayon makahatag og maximum economic benefit sa lokasyon niini uban sa moderno ug commercial nga mga estruktura.
Apan sumala ni Palma base sa gisulti sa architect sa CLI, nga dili magarantiya nga luwas ang Patria kon i-integrate kini sa bag-ong building nga tukoron.
“Ingon man niya lisod kay dili man siya guarantee ba nga like you i-integrate an old with a new. The old being old, dili guarantee nga earthquake proof..,” dugang pagpasabot ni Palma.
Siya nidugang nga dili na presentable ug practical ang duha ka andana nga Patria de Cebu, 64 ka tuig na nga edipisyo nga kanhi recreation center sa mga batan-on, nga gigamit karon sa artsidyosesis isip paabangan ngadto sa mga dayo sa Sugbo.
Sa gi-award nga kontrata ngadto sa CLI, sud sa 40 ka tuig abangan ug i-redevelop ang 6,670 metros kwadrado nga luna diin apil sa tukoron ang 14 ka andana nga edipisyo nga mo-operate isip hotel nga dunay retail spaces ug unom ka andana nga estruktura alang sa supermarket ug mga buhatan.
Niadtong Oktubre 29, napirmahan ang kontrata tali ni Palma ug Jose Soberano III, presidente ug chief executive officer sa CLI diin kini nakahatag na og pasiunang P50 milyones sa Artsidyosesis sa Sugbo isip abang alang sa construction phase sa mosunod nga upat ka tuig.
Kabahin sa Ave Maria blocks ug mga pag-ampo nga gihimo sa pagtukod sa Patria, si Palma namahayag nga daghan og mga pag-ampo ang himuon sa pagtukod og mga simbahan.
Sa buwag nga pakighinabi ni Msgr. Joseph Tan, tigpamaba sa artsidyosesis, siya nipasabot apil sa mga rason sa pagpaabang sud sa taas nga panahon sa yuta sa Patria de Cebu ngadto sa CLI ang daghang bayranan ug kabilinggan sa diyosesis.
Apil sa obligasyon sa diyosesis ang mga panginahanglan sa pagpatambal sa mga pari sa diocese labi na dunay mga gipaubos og cardiac o bypass operations ug dialysis sa Perpetual Succour Hospital.
Wa pay labot niini ang hamtong nga mga pari nga atimanunon ug gibuhi sa diyosesis, ang subsidy sa galastuhan sa seminaryo, sweldo sa mga katekista diin ang diyosesis maoy naghatag ug ubang bayranan.