MOABOT sa 12 ka mga sapa sa Central Visayas ang giila sa Department of Environment and Natural Resources nga pilot river systems nga ipaubos sa komprehensibo nga clean up human gimandoan ni Environment Secretary Roy Cimatu ang tanang regional directors sa ahensiya.
Mao kini ang lakang sa DENR 7 human ang kalihim nibahad sa mga regional director sa buhatan nga matangtang sa ilang pwesto o manubag kon mapakyas sa paglimpyo sa kasapaan nga ubos sa ilang hurisdiksyon.
Giluwatan ni Cimatu ang kamandoan atol sa pagbukas sa ikaupat nga International River Summit sa Radisson Blu Hotel, siyudad sa Sugbo sa miaging buwan.
Ang kalihim unang niingon nga responsibilidad sa DENR ang pagpalambo sa kahimtang sa kasapaan sa nasod ug iyang gihatagan og usa ka tuig ang mga labaw sa lainlaing mga rehiyon sa pagtuman sa iyang kamandoan.
Isip tubag, si DENR 7 Regional Executive Director Gilbert Gonzales nimando sa tanang provincial environment and natural resources officers sa pag-finalize sa profiling sa kasapaan sa ilang tagsatagsa ka dapit, makig-alayon sa local government units ug stakeholders ug ipatuman dayon ang pagpanglimpyo ug pagpahiuli sa kinabuhi sa 12 ka mga sapa nga pilot river systems.
Sa 12 ka mga sapa, unom ang naa sa Sugbo. Naglakip kini sa Guadalupe River ug Sapangdaku River ug tributaries niini sa Lusaran, sa siyudad sa Sugbo ug dakbayan sa Toledo; Bulacao River sa utlanan sa dakbayan sa Sugbo ug siyudad sa Talisay; Guindaruhan River sa Minglanilla; ug Luyang River sa Carmen.
Ang tulo naa sa Bohol nga mao ang Abatan River sa Cortes, Inabanga River sa Inabanga ug Manaba River sa Garcia Hernandez.
Ug laing tulo sa Negros Oriental nga mao ang Banica River sa Dumaguete, Panamangan River sa Bais City ug Sicopong River.
Sa pamahayag sa DENR 7, ang maong mga sapa gi-classify ubos sa Class C nga angay gahinan og panahon nga limpyohan, ug i-rehabilitate aron mahibalik sa iyang kanhi kalimpyo labi na naa kini mahimutang diin daghan ang kabalayan ug mga industriya.
Ang pagpanglimpyo himuon kaduha sa matag buwan, sa ikaduha ug katapusang Sabado.
Si Gonzales mapasalamaton sa aktibo nga suporta sa Cebu City Government sa kampanya pag-rehabilitate sa kasapaan ug waterways sa rehiyon.
“We welcome the active support and participation that we are now getting from our partner local government units and other stakeholders in cleaning up of our rivers. Rest assured that DENR will extend all the necessary technical assistance,” pasalig sa regional executive director sa DENR 7 sa ilang press release.
Ang Cebu City Environment and Natural Resources Office (CCENRO) mag-umol og task force nga maoy mopatuman sa tulo ka metros nga easement zone sa kasapaan ug ubang agianan sa tubig sa siyudad.
Agi og sanong, si Gonzales nimando sa mga Penro ug Cenro sa Sugbo nga magtukod og composite team nga maoy makiglambigit sa CCENRO sa pagpanday ug pagpatuman sa komprehensibo nga clean-up action plan.
Ang team langkuban sa pangu sa DENR sa rehiyon, Environmental Management Bureau, Mines and Geosciences Bureau, Department of Interior and Local Government, local government units, Penro, Cenro ug pribadong sektor.
Si Cimatu nipasidaan nga iyang susihon ang tanang kasapaan sa nasod unom ka buwan human sa 4th International River Summit ug ang rehiyon nga dunay labing limpyo nga mga sapa ang pasidunggan.
Ang DENR 7 nisalmot sa Search for RIVERs for Life (Recognizing Individuals/Institutions towards Vibrant and Enhanced Rivers) Awards nga gipasiugdahan ni Cimatu.
Gawas sa pagsulbad sa mga isyu sa easement zones ug pagpahiuli sa kasapaan, gitan-aw usab sa DENR 7 ang pagtubag sa ubang environmental concerns sa rehiyon apil ang solid waste, pagbaha ug disaster risk reduction.