HAPIT na ang Pasko. Mabatyagan na nato ang katugnaw sa buntag ug mabati ang mga awit nga sa ingon niining panahon lang ipatugtog. Maaninaw na usab nato ang umaabot nga kasadya tungod sa mga naggilak-gilak nga dayan-dayan ug sugang dagitabnon sa palibot.
Didto ako sa kaulohan sa niaging semana ug nakita ko nga mura'g adlaw gihapon ang Makati City bisan kung gabiing dako.
Mura'g walay kasubo ug problema sa tawo kay puno kanunay ang malls ug daghang mga sakyanan sa kadalanan.
Hinuon pagkabuntag balik na sab sa problema sa huot nga trapiko.
Ang laing problema sa ingon niining panahon mao ang paghinobra sa kaon ug inom. Matud pa sa mga eksperto sa kahimsog nga daghan ang magsakit ug mamatay pagkahuman sa dagkong pangilin sama sa Pasko tungod sa pagkaon ug inom.
Nakahinumdum ko sa niaging katuigan nga nidagsa dinhi sa sentro ang mga lumad gikan sa Paquibato ug Marilog aron mamasko.
Nahimo na kining tradisyon matag Pasko apan daghang problema nga mitumaw.
Usa niini ang problema sa kahimsog sa lumad, ilabi na sa mga bata nga nangatulog lang sa semento sa gym.
Human sa Pasko ug nakabalik na sa ilang lugar, matingala ka nga magpatabang na usab sila sa City Health Office tungod sa outbreak sa sakit, kasagaran niini ang diarrhea o kalibanga nga dala sa ilang kalit nga pag-usab sa ilang gikaon sa panahon sa Pasko.
Delikado sab sa mga senior citizens ug sa mga tawo nga may maintenance sa sakit nga diabetes ug alta presyon ang paghinobra og kaon.
Di ra ba malikayan ang mga lamiang pagkaon sama sa lechon, adobo, alimango, pasayan, humba nga mag-uyog-uyog ang tambok ug motalsik ang mantika kun kan-on.
Motaas sab ang problema sa atay ug ubang komplikasyon sa lawas tungod sa paghinobra sa pag-inom ug ilimnon nga makahubog.
Sa niaging semana, gibalita nga sobra 10 ang namatay tungod sa pag-inom kuno sa kontaminadong lambanog nga gikan sa lubi.
May lambanog ba nga gikan sa buli sa Surigao?
Busa nanawagan na ang mga lokal nga opisyal nga dili magpataka sa pag-inom og lambanog ug ubang lokal nga ilimnon nga makahubog nga dili klaro kung asa gikan.
Tan-awon kanunay ang label sa ilimnon ug sakto ang tabon nga gikan sa pabrika.
Busa way kumo sa pagpaminaw sa tambag sa doktor ug eksperto sa panglawas aron malikayan ang pagmahay sa kaulahian.
Hinuon, bisan may sakit ang tawo kinahanglan gihapon siyang mokaon.
Ang tambag sa mga nutritionist kay moderate lang sa pagkaon sa bisan unsang makaon.