KIDAPAWAN CITY -- Padayon pang mihimo og imbestigasyon ang kapulisan sa dakbayan bahin sa kamatayon sa bag-ong nigradwar nga biologist sa University of the Philippines (UP)-Los Banos atol sa pagsaka sa Mt. Apo niadtong Sabado sa gabii, Disyembre 8.
Giila ang biktima nga mao si James De Villa Alvarez, wildlife biologist ug nagpuyo sa Lemery, Batangas.
Gibutyag ni Kidapawan City Chief of Police Superintendent Ramel Hojilla nga niadtong Disyembre 5, misaka ang grupo ni Alvarez aron nga mohimo og herpetofaunal research sa Mt. Apo.
Apan samtang naghimo og research niadtong Disyembre 7, kalit lang matud pa nga nalipong si Alvarez ug gitabang sa iyang mga kauban.
Sumala kang Kristian James Suetos nga gibati og sobrang kasakit sa tiyan ug luya na kaayo si Alvarez.
Gawas niini, naglisud na sab og pagginhawa ang biktima sa dihang niabot sila sa Lake Venado, pakanaug na sa Mt. Apo aron dalhon siya sa balay tambalanan sa Kidapawan City.
Gikompirma ni Suetos nga nakaabot na sila sa Camp Koong sa ubos nga bahin sa Mt. Apo ug naghulat sa Rescue 911 sa diha nga namatay si Alvarez.