SUGOD kagahapon giapud-apod na sa kagamhanan sa dakbayan sa Mandaue ang katapusan nga hugna sa financial assistance alang sa mga senior citizen.
Unang nakadawat ang mga senior citizen sa ilang tag P2 mil nga cash gifts ang gikan sa Barangay Centro, Guizo ug Mantuyong, nga gihatag diha su’d sa Mandaue City Sports Complex.
Samtang sa ubang mga barangay makuha nila kini diha sa ilang HELPS Center. Ang pagpang-apud-apud hangtud pa karong Byernes, Dec. 14.
Alang niadtong di’ makakuha sa ilang mga cash gifts sa ialng barangay, mahimo pa kini makuha sa City Treasurer’s office (CTO) sa Disyembre 18 ngadto sa 21 alang sa special releases.
Samtang alang niadtong mga bed-ridden na, ang gitugutan nga aduna sila’y i-authorize nga sakop sa pamilya, nga mokuha sa financial assistance ngadto sa CTO, adunay porma niini diha sa OSCA, ug kinahanglan usab nga adunay authorization letter, ug medical certificate nga pinirmahan sa doctor, o health officer o barangay health worker.
Kini aron wa’y di taga dakbayan sa Mandaue ang makapahimus pa niini.
Ang syudad sa Mandaue ang adunay dul-an sa 20 mil ka mga senior citizen, nga makdawat og P6 mil nga financial assistance sa usa ka tuig, una nadawat nila ang unang hugna niadtong Abril, ikaduha niadtong Agusto.
Samtang sa sunod Lunes, Disyembre 17 usab madawat sa kapin 4 mil ka mga Differently-able Person sa syudad ang ilang tinuig nga P3 mil nga cash gift gikan sa Mandaue City government.
LAPU-LAPU
Nakadawat ug sayong pinaskohan gikan sa city government ang moabot sa 25 mil ka senior citizens ug 5 mil ka persons with disabilities (PWDs) sa dakbayan sa Lapu-Lapu.
Ang matag usa ka senior citizen nakadawat ug 4mil pesos nga cash gift samtang 3 mil kinyentos usab Ang nadawat sa PWD’s.
Si Lapu-Lapu City Mayor Paz Radaza maoy personal nga nangunay pagsusi sa pagpang apod-aud sa mga cash gift ngadto sa mga benepisyaryo sa nagkadaiyang gymnasium sa dakbayan sama sa Hoops Dome diin gipahigayon ang pagpanghatag sa cash gift sa Brgy Gun-ob ug Pajo ug ingon man sa Brgy Basak.
Gawas sa mga barangay sa mainland sa dakbayan dungan usab nakadawat sa ilang cash gift ang senior citizens ug pwds sa isla sa Olango.
Midonar usab ang city government ug upat ka mga mga TV monitor sa simbahan sa Brgy Sta Rosa isla sa Olango nga gikatakdang magamit usab unya sa ilang parokya.
“Ug duha ka, senior citizens ug pwd, duha imo madawat. Gisayo nato para mahana-ay ang ila pagpamalit,” matod pa ni Radaza.
Sa miaging tuig tag P3,500 ang nadawat sa mga senior citizens samtang P3 mil usab ang sa PWDs.
Niadtong miaging Biyernes gilingaw usab ang moabot sa 75 ka mga batang adunay mga apan kun children’s with disabilities sa usa ka resort sa Brgy Marigondon.
Ang mga bata nagpangedaron ug 0 ngadto sa 14-anyos nga anaa sa pag-amuma sa Stimulation and Threapeutic and Activity Center (STAC) sa Brgy Gun-ob.
Mga kinilong bugas ug mga grocery items ang gipang apod-apod ngadto sa mga ginikanan sa mga bata.
Gilingaw usab sila sa tibuok adlaw nga duwa uban ang ilang tagsatagsa ka mga pamilya.
Mao kini hinungdan nga alegre ang pasko sa mga senior citizens sa Lapu-Lapu ug Mandaue tungod sa gamay nga hinabang nga pinansiyal gikan sa ilang lokal nga kagahanan, apan kinahanglan nga opisyal nga rehistrado sila sa naasoy nga mga kagamhanan sa Metro Cebu. (FMD ug GCM, Correspondents)