MOABOT ngadto sa 36 ka PUV stops ang giila sa Cebu City Transportation Office (CCTO) nga pasakyan ug panaugan sa mga pasahero sa higayon nga mag-operate na ang 40 ka mga modernong Bus-Jeep (beep) sa ilang duha ka mga rota.
Ang route number one nga manukad sa Cebu City Hall paingon sa Asia Town IT Park adunay siyam ka stops samtang unom gikan sa IT Park paingon sa Cebu City Hall.
Ang unang drop-off ug pick-up nahimutang kilid sa Plaza Sugbo ( P. Burgos St.); ikaduha sa S. Osmeña Ave. unahan sa PUJ stop duol sa Pier 1.
Ang ikatulo nahimutang unahan sa waiting shed sa V. Sotto St., ug ikaupat sa Robinsons Galleria dropoff area sa Benedicto St.
Sunod nga stop nahimutang sa Gen. Maxilom Ave. duol sa Cebu City Health Department.
Ikaunom nga stop naa sa Samar Loop sa existing nga bus stop sunod adto sa Mindanao Avenue ilawom sa waiting shed sa Cebu Business Park.
Ang ikawalo nahimutang atubangan sa BIR sa Archbishop Reyes ug ikasiyam sa existing nga bus stop sulod sa IT Park.
Samtang gikan sa IT Park, unang stop nahimutang sa Pope John Paul II Ave., unahan sa existing nga PUJ stop duol sa Petron Gas station, ikaduha anaa sa eskina New Era st.
Ikatulo anaa sa Andres Soriano Avenue unahan sa PUJ stop, sunod sa Robinsons Galleria dropoff, ika-14 sa Mj Cuenco Ave. unahan sa eskina V. Gullas dayon lahos sa Plaza Sugbo.
Daghan ang PUV stops sa ilang ikaduhang rota nga manukad sa Duterte Street sa Banawa paingon sa Sykes sa Panagdait, Barangay Mabolo nga adunay siyam ka loading ug unloading areas.
Duna say 11 ka stops ang gikan sa Sykes paingon sa Paseo Arcenas sa Banawa.
Ang unang stop sa Paseo Arcenas, dayon sa Duterte st. atubangan sa Margaret’s Place, ikatulo duol sa entrance sa Sacred Heart Village.
Ika-4 atbang sa Espina Village sa B. Rodriguez, sunod sa waiting shed sa One Mango sa Gen. Maxilom Ave., sunod didto sa atbang sa USC North Campus dayon sa Cardinal Rosales Ave. duol sa PUJ stop, bus stop sa IT Park human largo sa Gagfa/Sykes.
Gikan sa Sykes, sunod stop nahimutang duol sa Sarrosa Hotel, Mindanao Ave dayon sa F. Sotto duol sa Richmond Hotel.
Ika-15 nga stop nahimutang sa D. Jakosalem buyon sa Sacred Heart Church, sunod sa Ramos Market, eskina Ranudo Street, sunod sa Osmeña Boulevard duol sa Metrobank, B. Rodriguez duol sa Sojo Mall sunod duol sa D’Voice dayon balik sa Paseo Arcenas.
Ang maong mga PUV stops igo sab nga mohaom ug di makababag ang 3.5 metros nga gilapdon sa beep.
Si Ouano niawhag ngadto sa mga umaabot nga pasahero nga mosunod sa mga drop-off ug pick-up areas aron di makamugna og traffic.
Ang matag rota adunay 20 ka beep nga pabiyahion sa Persano Corp. nga maoy operator sa bag-ong mga de pasaheroan.
Ang CCTO niduso sa ilang proposed PUV stops ug rota ngadto sa buhatan ni Konsehal Dave Tumulak ug Eugenio Gabuya Jr para iduso ngadto sa konseho.
Ang duha ka konsehal maoy moduso og resolution ngadto sa konseho para matugotan ang pagbiyahe sa modern PUV.
Apan posible nga sa buwan sa Enero na kini matagad sanglit wala nay regular session ang konseho sa buwan sa Disyembre.