DUNAY usa ka hanggaw nga nisaway kanako diha sa Facebook nganong manaway ko sa oposisyon sa Syudad sa Sugbo apan nagsuporta ko kang SAP Bong Go.
Kay makadaot ba sa kandidatura ni Bong Go nga duna siyay tigsuporta nga wala makalinya sa PDP-Laban sa Syudad sa Sugbo? Di ba makaayo sa usa ka kandidato alang sa pagka-senador nga suportahan sab siya sa dakong bahin sa pikas kampo?
Mahinungdanon kini labi na nga ang Sugbo makahatag og dakong mayoriya kon makakuha ang usa ka kandidato alang sa pagka-senador sa suporta sa manag-atbang nga kandidato.
Sumala sa opisyal nga record sa Commission on Elections, ang Sugbo dunay 3,082,621 registered voters. Apil niini ang mga botante sa mga highly urbanized cities sama sa Cebu City (709,608 ka botante), Mandaue City (226,091 ka botante), ug Lapu-Lapu City (214,117 ka botante).
Kon ako usa ka operator alang sa usa ka nasudnong kandidato, siguraduhon nako nga ang akong kandidato dunay boto gikan sa nagka-atbang nga mga kandidatong lokal.
Pananglitan, diha sa Syudad sa Mandaue, nag-atbang karon ang mga pundok sa PDP-Laban nga gipangulohan ni Kong. Jonas Cortes ug ang Hugpong Mandauehanon ni Mayor Luigi Quisumbing.
Alang kanako, mahinungdanon nga makakuha og suporta sa duha ka kampo labi na nga, sa akong tan-aw, murag tabla karon ang duha.
Samot pa kon dinhi sa Syudad sa Sugbo diin ang Barug PDP-Laban walay record nga nakadaog sukad sa 2016.
Gani, sa miaging eleksyon sa barangay, ang igsuon mismo sa standard-bearer sa Barug PDP-Laban nga si Bise Mayor Edgar Labella namunbon diha sa Barangay Mabolo. Wa sab makaugpo ang ilang kandidato sa Sangguniang Barangay.
Nasundan kini sa election sa Association of Barangay Councils (ABC) diin napildi sab ang ilang kandidato.
Tungod niini, di ko makapaabot nga makahatag kining maong pundok og dakong suporta alang sa mga nasudnong kandidato. Ang mga kandidato alang sa pagka senador angayang malipay nga duna silay tigsuporta sa pikas kampo.
TUBURAN
Ang usa ka operator alang sa kandidato pagka-senador kinahanglang magmatngon nga dili masilo ang maskin kinsa nga kampo.
Nakakuyog man gud ko sa pag-adto ni kanhi PNP Chief Ronald “Bato” dela Rosa sa lungsod sa Tuburan duha ka semana nga milabay diin human siya nagdiskurso atubangan sa anti-drug summit nga gipahigayon ni Mayor Aljun Diamante, niadto sab dayon siya sa usa ka politikanhong kalihokan sa iyang kaatbang nga si Daphne Lagon.
Nagtuo tingale si Bato nga sakto ang iyang gibuhat. Apan atong nahibaw-an nga nasubo ang kampo nga nigasto alang sa gasoline sa helicopter nga iyang gisakyan. (@anol_cebu sa Twitter)