SUPERBALITA CEBU

Espinoza: Malibre silang tanan!

DUDA. Daghan ang dili makatuo sa desisyon sa Sandiganbayan sa paglingkawas ni Sen. Bong Revilla sa kaso nga plunder ug korapsyon sa giingon nga pagpangawkaw sa panalapi sa atong kagamhanan apan nakonbikto sila si Janet Lim Napoles ug Atty. Richard Cambe, nga staff sa senador.

Matod pa sa desisyon sa Sandiganbayan ang prosekusyon wala makaprobar nga nakadawat si Senador Revilla sa kickback sa kwarta nga nakomkom ni Janet Lim Napoles gikan sa iyang Priority Development Assistance Fund (PDAF) nga giapud-apud ngadto sa peke nga mga foundation niini. Ang dakong apan sa desisyon sa Sandiganbayan kay samtang nalibre si Senador Revilla sa kaso nga pangurakot apan gimandoan si Revila nga iuli sa kagamhanan ang P124 milyunes nga nasulod sa iyang bank account, nga ang giingon nga bahin sa senador sa kickback. Giakusahan si Revilla nga nakadawat og P224,512,500 nga kickback.

Ang desisyon nga iuli ni Revilla ang P124 milyunes nga giingon kickback, matod pa ni Abdiel Dan Elijah Fajardo, IBP national president, sayop ni nga kantidad tungod kay ang husto P185 milyunes, nga maoy gihisgutan sa supak nga opinyon nila ni Justices Efren de la Cruz ug Maria Theresa Dolores Gomez-Estoesta.

Si Napoles, nga naanggaan nga PDAF queen scam, mao ang naghimo og mga foundation o pundok nga mao kunohay ang midawat sa PDAF ni Senador Revilla apan nahibaw-an sa pag-imbestigar nga ang giingon nga mga benepisaryo sa PDAF sa senador mga peke diay.

Sa PDAF scam ni Napoles nalakip sila si Senador Juan Ponce Enrile ug Jinggoy Estrada nga napasakaan og sumbong sa Sandiganbayan sa kaso nga plunder ug kurapsyon, nga hangtod karon pending pa ang kaso apan nakapiyansa sila. Tungod kay pupariha ra man ang kaso ni nila Revilla, dili layo sa tinuod nga sila Enrile ug Estrada ma-acquitted usab sa kaso nga ilang giatubang.

Si Erin Tañada dili makatuo sa desisyon tungod sa gibug-aton sa ebidensya nga gilatag sa Anti-Money Laundering Council (AMLC) diin nakita nga ang deposito sa banko ni Revilla, iyang asawa nga si Rep. Lani, ug sa ilang mga anak mikabat og P87,626,587.63 gikan niatong April 6, 2006 hangtod April 28, 2010 nga mao sad ni ang petsa nga natala sa libro ni whistleblower Benhur Luy sa pagdawat ni Revilla sa komisyon gikan ni Napoles sa transaksyon sa iyang PDAF.

Ang nakahatag og dako nga kalibog o katahap sa katawhan mao ang order sa Sandiganbayan nga iuli ni Revilla ang P124 milyunes sa kagamhanan nga unta wa man siya makonbikto. Kon dili sad-an si Revilla nganong iya man iuli ang P124 milyunes? Tungod ani, napagya sa akong mga amigo mora lang og nangutang o nanghuwam si Revilla og P124 milyunes sa kagamhanan unya ipauli na.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph