Pagkatoytoy nga desisyon. Mao kini ang paghulagway sa uban sa pagka-absuwelto ni kanhi senador Ramon “Bong” Revilla Jr sa iyang kasong gi-atubang nga plunder. Si Bong uban nila ni kanhi senador Juan Ponce Enrile ug Jinggoy Estrada gipangkiha og plunder gumikan sa ilang gipangawkaw gikan sa ilang Priority Development Assistance Fund (PDAF) o “pork barrel”. Kining pork barrel pundo kini alang sa mga nasudnong magbabalaod alang sa ilang mga proyekto.
Unsa man ang plunder? Base sa Section 2 Republic Act 7080 nagkanayon nga ang Plunder nakomiter sa usa ka public officer pinaagi sa pagpakigkonsabo sa iyang mga kabanay, kanegosyo ug mga kaila nga makapangawkaw og salapi sa kagamhanan nga mi-abot ngadto sa P50 milyones nga kantidad. Si bisan kinsang tawo nga nahilambigit niini, kinahanglan gyud nga pagasilutan.
Sa kaso ni Bong, nakapagawas siya og P517 milyones sa iyang pork barrel ngadto sa mga pekeng foundations og non-government organizations nga gitukod ni Janet Napoles. Siya ang moduol sa mga magbabalaod ug mokombensi kanila nga mobubu sa ilang pork barrel sa iyang mga foundations unya ihatag ang katunga niini ngadto sa mga senador.
Pinaagi sa botasyon nga 3-2, ang first division sa Sandiganbayan mi-absuwelto ni Bong kay matod pa napakyas ang prosecution sa pag-presentar og mga ebedensiya nga nagpamatuod nga nakadawat si Bong sa iyang kickbacks ug commission sa iyang pork barrel nga nagkantidad og P224 milyones. Ang mga saksi nga mga kanhi staff ni Napoles nagkanayon nga wala sila makakita nga nakig-transaksiyon si Bong kanila. Gi-forged o gisunod ang mga pirma ni Bong. Ilang gitumbok si Benhur Luy nga maoy misundog sa mga pirma ni Bong.
Pastilan no. Motuo kaha mo nga wala makadawat ni Bong? Sa desisyon, ipapauli ni Bong ang P124 milyones. Ug akoy Bong nganong mo-uli man ko nga wala man koy nadawat base sa desisyon. Siguro ang “agimat” ni Bong ang nakapa-absuwelto kaniya? Sama sa iyang amahan nga si Ramon Revilla Sr., nga maoy “king of agimat.”(bobbygnalzaro@gmail.com)