Editoryal: Si Revilla ray nasayod

NAHIMONG sumsuman sa kadaghanan kining wala damhang pagka-absuwelto ni Senador Bong Revilla, kanhi aktor nga nahimong pulitiko, sa kasong plunder diin siya nalambigit sa Priority Development Assistance Fund (Pdaf) scam.

Daghan ang wa kauyon sa kinatibuk-ang hukom sa Sandiganbayan (3-2) human gipakawalay sala ni Revilla, samtang ang duha ka mga kakunsabo niini, lakip sa iyang tawo nga si Richard Cambe, ug ang pork barrel broker Janet Napoles nakombikto ug gisentensiyaan sa pagkabilanggo sa tibuok kinabuhi.

Sa tinamban nga pangagpas, lisod tuohan nga inosente si Revilla niining kasoha tungod kay iya mang buhatan ang gigamit aron matigayon ang pagpangurakot.

Buot ipasabot nga dili makalihok kining mga tawhana kon walay pagtugot mismo ni Revilla.

Pero lagi kay gipaagi man sa korte sa Sandiganbayan dili ta makapaabot nga ang tanang mga pangagpas mahisubay atol sa makuting imbestigasyon.

Sa korte man gud daghan ang pasikot-sikot nga mahimong kalutsan sa mga akusado. Hinuon magdepende ra usab kini kon unsa ka maayong laki ang abogado.

Apan di usab nato ikasalikway nga posibling aduna usay panahon nga mataligam-an sa mga maghuhukom ang mga importanting butang nga makapausab sa dagan sa imbestigasyon.

Dunay mga lig-ong ebidensiya nga dili mahatagan og importansiya.

Sa kaso ni Revilla, matataw ug maklaro nga naabsuwelto siya tungod sa teknikalidad apan wa kini magpasabot nga wa siya malambigit sa maong pagpangurakot.

Sa korte limpyo ang iyang pangalan, apan sa mata sa publiko posibling dili kini mao.

Sa laktod nga pagka-sulti, siya ug ang Kahitas-an maoy labing nasayod sa kamatuoran.