NAGKA-PROBLEMA na sab ang bag-o pa lang nga gisubhan nga Bohol Panglao International Airport kaniadtong Lunes.
Tiaw bay nawagtang ang koryente.
Tungod kay way koryente, dili matangtang ang bridge o tube nga maoy giagian sa mga pasahero padung sa sud sa eroplano.
Tungod kay di matangtang, wa makalupad ang eroplano.
Maoy hinungdan nga abunda kaayo ang mga bagotbot sa mga pasahero, labi na gyod kadtong dunay mga connecting flights.
Imbes molupad ang eroplano sa 7:10 sa buntag, hapit na mo-alas 10 makalupad ang eroplano.
• • •
Dako kaayo ang kadaot sa maong pagka-aberya.
Nagsunod-sunod na ang kalangan sa paglupad, og mao kini hinungdan nga nag-ulan og batikos batok sa mga tinugyanan sa airport tungod niini.
Lisod masabtan ang maong problema.
Dunay regular nga koryente gikan sa Boheco II.
Dunay, matod pa, duha ka generator set.
Buot ipasabot, kon mawagtang ang koryente gikan sa Boheco II, deretso dayon og puli ang generator set.
Apan asa na man ang maong ipuli nga genset nga wala man gihapon mabalik ang koryente bisan sa pipila ka mga oras gikan sa pagkapalong niini?
• • •
Mao kini hinungdan nga nakapangutana kita sa miaging semana og ngano nga gidali-dali man gyod ang pagsubo sa maong airport nga dili pa man kini kompleto?
Unsa man ang hinungdan nga kinahanglan man gyod nga subhan kini sa Nobiembre 27?
Dili ba diay mahimo og sa sunod tuig na lang o kanang panahon nga hitsas ug kompleto na ang maong airport?
Nganong dalion man gyod pagsubo?
Duna bay mga tawo nga dili na makahulat og dugang panahon alang sa pagsubo sa maong airport?
• • •
Human makalarga ang maong eroplano sa Cebu Pacific, daghan ang nagtuo nga nabalik na ang normal nga operation.
Simbako.
Tiaw mo ba nga hilabihang inita ang sulod sa maong airport sa pagka-hapon na tungod kay wala gihapoy koryente nga mopa-andar sa air-conditioning unit.
Matod pa sa usa ka doktora, nagkinahanglan og higante nga paypay ang mga pasahero tungod sa kainit sa sulod sa pre-departure area.
Tiaw mo na karon.
Matimbang kaha ang kasuko, kalagot ug mga bagotbot sa mga naapektohang pasahero tungod sa pagka-wagtang sa koryente?
Paminaw nako, dili makaon og iro o iring ang mga reklamo sa mga pasahero.
• • •
Karon, mabasol ba ang kadaghanan sa mga pasahero nga wala mouyon nga subhan ang maong airport tungod kay dili pa kini andam?
Imbes malipay, daghan na hinuon ang nangasuko tungod sa maong pagdali-dali og subo sa maong airport.
Segurado ako nga nagbaga-baga ang mga bagotbot sa mga turista gikan sa gawas tungod sa pagka-palpak sa maong airport nga bakikaw og pangalan.