NAGGITAB-GITAB na sab sa kahayag ang dakbayan sa Panabo, inubanan sa nagkadaiyang kolor ug nagsayaw-sayaw nga mga Christmas lights human gibuksan ang Paskohan sa Panabo, Disyembre 5 sa Panabo City Hall Grounds.
Luyo sa paborito sa kadaghanan alang sa ilang Instagram perfect nga mao ang “tunnel of lights,” mas malingaw suma pa ang mga bisitang mosud-ong sa lugar tungod sa dugang atraksiyon nga gibutang.
Anaa ang Christmas Village miniature sa tunga, may life-size nga balay, lakip na ang sleigh ni Santa ug suga nga daw tubig nga nagdagayday gikan sa taas.
Mikumpleto sa set-up ang pagpasiga sa higanteng Christmas tree.
Gibutyag sa Tourism Promotion Section, ang Paskohan Village bukas sa publiko, 6 p.m. ngadto 12 midnight hangtud Enero 2019. (PR)